चार्ज भइरहेका स्मार्टफोन पड्किँदा सिइओको मृत्यु

स्मार्टफोन पड्किएको खबर बेलाबेला सार्वजनिक भइरहन्छन् तर यसपटक स्मार्टफोन पड्किँदा मलेसियामा क्रेन्डल फन्ड संस्थाका सिइओ नाजरिन हसनको मृत्यु भएको छ ।

खबरका अनुसार चार्ज भइरहेका क्रममा स्मार्टफोनमा भएको बिस्फोटले उनको ज्यान लिएको हो । क्रेडल फन्ड मलेसियाको वित्त मन्त्रालयको स्वामित्वमा रहेको संस्था हो । हसन ब्ल्याकबेरी र ह्वावेका स्मार्टफोनका प्रयोगकर्ता थिए ।

स्रोतका अनुसार घटनाका बेला दुबै स्मार्टफोन उनको बेडरुममा चार्ज भइरहेका थिए । रिपोर्टका अनुसार स्मार्टफोन पड्किँदा कोठामा आगलागी भयो जसले पछि  भयानक रुप लियो । यद्यपी, दुईमध्ये कुन फोन बिस्फोट भयो त्यो भने  जानकारीमा उल्लेख छैन ।

हसनको परिवारका एक सदस्यका अनुसार उनको मृत्यु आगलागीका कारण भएको होइन । उनले सोसल मिडियामा दिएको जानकारी अनुसार उनले चलाउने दुई फोनमध्ये एउटा बिस्फोट भयो जसका कारण फुटेको सिसा उनको टाउको पछाडि छिरेको थियो । यसले उनलाई गम्भीर चोट पुर्याएको थियो । त्यसपछि बिस्फोटपछि कोठामा आगलागी भएको थियो । आगो लाग्नु अघि नै उनको मृत्यु भइसकेको थियो ।

द मलेसियन इनसाइटलाई उनको परिवारका एक सदस्यले भने, ‘उनीसँग दुईवटा फोन थिए, एक ब्ल्याकबेरी र अर्को ह्वावे । कुन फोन पड्कियो, हामीलाई थाहा छैन । दैनिक गरिने सामान्य कामका कारण उनको मृत्यु हुन्छ भनेर कसले सोचेको होला । उनका तीन सन्तानले अब बुवा बिना नै आफ्नो जीवन बिताउनुपर्नेछ ।’

आधिकारिक बयानः
यद्यपी, घटनाको अनुसन्धान गरिरहेका अधिकारिका अनुसार उनको मृत्युको कारण अर्को नै छ । पुलिसको दाबी अनुसार उनको मृत्यु स्मार्टफोनको टुक्राका कारण नभई बिस्फोटपछि सास फेर्न गाह्रो भएर भएको हो ।

यसैबीच क्रेन्डल फन्डद्वारा जारी गरिएको एक आधिकारिक बयान भन्छ, ‘पोस्टमार्टम रिपोर्टमा बताए अनुसार उनी नजिकै चार्जमा राखिएको एउटा फोन बिस्फोट पछिको एउछा चोटका कारण उनको मृत्यु भएको हो ।’