संसद चल्नुअघि ६४० जनाको कोरोना परीक्षण, चार जनामा संक्रमण

काठमाडौँं । मंगलबारदेखि सुरु हुन लागेको संघीय संसदको बैठकलाई लक्षित गरि सरकारले सभामुखसहित सांसद, संसद सचिवालयका कर्मचारी, मर्यादापालक तथा सुरक्षाकर्मी गरी ६४० जनाको कोरोनाभाइरस परीक्षण गरेको छ । एन्टीजेन विधिबाट गरिएको परीक्षणमा ४ जनामा कोरोना संक्रमण पुष्टि भएको छ ।

पोजेटिभ आउने ४ जनामा दुई जना संसद सचिवालयका कर्मचारी र दुई जना सुरक्षाकर्मी रहेको परीक्षण गर्न जाने स्वास्थ्य सेवा विभाग इपिडिमियोलोजी तथा रोग नियन्त्रण महाशाखा (इडिसीडी)को टोलीले जानकारी दिएको छ ।

स्वास्थ्यटोलीको नेतृत्व गरेका इडिसिडीका ल्याव टेक्निसियन निरीक्षक भोला अधिकारीले विहान ११ देखि दिउसो सवा तीन बजेसम्म १५७ जना सांसदसहित ६४० जनाको कोभिड परीक्षण गरेको बताए । उनले अझै २६० जनाको परीक्षणको रिपोर्ट आउन बाँकी रहेको र उनीहरुको रिपोर्ट भोलि बिहान आउने जनाए ।