बजार अनुगमन : ४ लाख ६० हजार रुपैयाँ राजस्व संकलन

काठमाडौँ । काठमाडौँ महानगरपालिकाले पर्व लक्षित बजार व्यवस्थापनका लागि गरेको १९ दिने अनुगमनका क्रममा ६१ वटा व्यापारिक प्रतिष्ठान हेरिएका छन् । यीमध्ये अनुचित व्यापारिक क्रियाकलाप गर्ने ११ वटालाई जरिवाना तिराउँदा ४ लाख ६० हजार रुपैयाँ राजस्व संकलन भएको छ ।

जसमध्ये ७० हजार रुपैयाँ वाणिज्य विभागको खातामा र ३ लाख ९० हजार रुपैयाँ काठमाडौँ महानगरपालिकाको खातामा जम्मा भएको छ । महानगरले आफ्नै निरीक्षण अधिकृत तोक्नु अघि गरिएको जरिवाना वाणिज्यको खातामा र त्यसपछिको जरिवाना महानगरको आफ्नै राजस्व खातामा जम्मा भएको हो । 

आज बजार व्यवस्थापन तथा उपभोक्ता हित संरक्षण समितिकी संयोजक एवं महानगरकी उपप्रमुख हरिप्रभा खड्गी श्रेष्ठको अध्यक्षतामा बसेको अनुगमन समीक्षा बैठकमा यस सम्बन्धी जानकारी दिइएको हो । समीक्षामा बोल्दै उपप्रमुख खड्गी श्रेष्ठले, अहिलेसम्म गरिएका अनुगमनका सिकाइ र उपलब्धीलाई संस्थागत गर्दै उत्पादनलाई बजारसँग जोड्ने प्रणालीका चक्रमा पहुँच बढाउने संयन्त्र विकास गरिने बताउनुभयो । हरेक पटक एउटै समस्यामा अल्झिनु हुँदैन ।

एक पटक प्रयास गर्दा त्यस क्षेत्रमा सुधार भएको उपभोक्ताले अनुभूति हुने प्रणाली विकास गरौँ । पर्वमा देखिएको सक्रियतालाई बर्षभरि नै निरन्तरता दिऔँ । खड्गी श्रेष्ठको भनाइ थियो । अनुगमनका क्रममा देखिएको समस्याका विषयमा जानकारी दिँदै निरीक्षण अधिकृत हरिबहादुर भण्डारीले, खानेकुरा तयार पार्न प्रयोग गरिने कच्चा बस्तुको गुणस्तरमा सबैभन्दा समस्या रहेको उल्लेख गर्नुभयो । उपभोक्ताहरुको ध्यान तयार भइसकेका खानेकुरा हुन्छ । यो स्वभाविक पनि हो । उपभोक्ताले कच्चा पदार्थमा पहुँच नराख्ने भएकोले हामीले भान्छाको व्यवहार हेर्नुपर्छ । भण्डारीको भनाइ थियो । 

अनुगमनबाट प्राप्त तथ्य विश्लेषणबाट आगामी कार्यक्रम निर्धारण गर्नुपर्छ । यसका लागि हामी कानुनी प्रबन्धको अध्ययन, सूचना संकलन र अवस्थाको पहिचान प्रतिवेदन निर्माणका क्रममा छौँ । समीक्षामा अनुगमन तथा मूल्याङ्कन इकाईका प्रमुख नरेन्द्र विलास बज्राचार्यले, बजार व्यवस्थापन गर्न महानगरको नीति र कार्यक्रम रहेको काम गर्न सहज भएको उल्लेख गर्नुभयो । त्यस क्रममा तिहार पर्वलक्षित मिठाइजन्य व्यवसायमा गुणस्तरको समस्या रहेकोले नियमित निगरानी हुनुपर्नेमा जोड दिइयो । महानगरले मिठाइसँगै तिहारमा प्रयोग हुने फूल तथा माला र ड्राइ फुडको गुणस्तर, मूल्य जस्ता विषय हेर्ने भएको छ ।