प्रतिनिधिसभा बैठकको सुरुमै एमाले सांसदले थाले नाराबाजी, विरोध छाडेर संवादमा आउन सभामुख सापकोटाको अपिल

काठमाडौं । नेकपा एमालेका सांसदहरुले प्रतिनिधिसभाको बैठकमा नाराबाजी सुरु गरेका छन् । सभामुख अग्निप्रसाद सापकोटाले बैठकको काम कारवाही सुरु भएको बताउने बित्तिकै उनीहरुले सभामुखको आसन अगाडि पुगेर नाराबाजी थालेका हुन् ।

विपक्षीले अग्रभागमा आएर नाराबाजी र विरोध सुरु गरेपछि सभामुख अग्नि सापकोटाले विरोध छाडेर छलफल र संवादमा आउन अपिल गरेका छन्। उनले निरन्तरको नाराबाजी र अवरोधले संसदमा आफ्ना भनाइ राख्न पाउने अन्य सांसदहरुको अधिकार मिचिएको उल्लेख गर्दै आआफ्नो ठाउँमा गएर बस्न विपक्षी सांसदहरुलाई अनुरोध गरेका छन्।

गत शुक्रबारको बैठकमा एमाले सांसदहरु मर्यादापालकको काँधमा चढ्ने, माइक तान्ने लगायतका क्रियाकलाप गरेपनि आजको बैठकमा भने संयमित हुने भएका छन् ।

प्रतिनिधिसभा बैठक अघि बसेको एमाले संसदीय दलको बैठकमा सो दलका संसदीय दलका नेता केपी शर्माओलीले बैठकमा संयमित हुन निर्देशन दिएका थिए । उनले निश्चित र मर्यादित नारा लगाउन मात्र निर्देशन दिएका थिए ।