अहिले हिँडिरहेको मार्गबाट मुलुक शान्ति, स्थायित्व र समृद्धितर्फ जादैन : कमल थापा

काठमाडौँ । राष्ट्रिय प्रजातन्त्र पार्टीका अध्यक्ष कमल थापाले अहिले हिँडिरहेको मार्गबाट मुलुक शान्ति, स्थायित्व र समृद्धितर्फ नजाने र त्यसको निम्ति वैकल्पिक मार्ग आवश्यक भएको बताएका छन्।

पार्टीको स्थानीय तह निर्वाचन परिचालन समितिको भर्चुअल बैठकमा बोल्दै अध्यक्ष थापाले गणतन्त्र, धर्मनिरपेक्षता र संघीयता विदेशीले बोकाइदिएको बताए।नेपालको राष्ट्रिय राजनीतिमा राप्रपालाई बलियो राष्ट्रवादी प्रजातान्त्रिक शक्तिको रुपमा स्थापित गराउने भन्दै थापाले गणतन्त्र, धर्म निरपेक्षता र संघीयताको विकल्पमा राजासहितको प्रजातन्त्र, सनातन हिन्दु राष्ट्र र स्थानीय स्वायत्त शासनमा आधारित विकेन्द्रीत शासन प्रणाली मुलुकको निम्ति आवश्यक भएको दाबी गरे।

स्पष्ट विचार र अलग पहिचान स्थापित गर्न लागिपरेका सिद्धान्त निष्ठ नेता र कार्यकर्ता पार्टीको पुँजी भएको भन्दै थापाले इमानदारीतापूर्वक निर्वाचन केन्द्रित हुन कार्यकर्ताहरुलाई आग्रह गरे।

विदेशी हस्तक्षेप र प्रभावलाई रोक्न स्वाधिनताको रक्षाको निमित्त राप्रपा बलियो हुन अपरिहार्य भएको थापाको तर्क थियो। आजको भर्चुअल बैठकमा गण्डकीसहित प्रदेश लुम्बिनी,  कर्णाली र सुदूरपश्चिम प्रदेशका जिल्ला अध्यक्षहरुको सहभागीता रहेको सचिवालय सदस्य राजाराम बर्तौलाले जानकारी दिए।