यसै साता मौद्रिक नीति ल्याउने राष्ट्र बैंकको तयारी

काठमाडौं । सरकार परिवर्तनसँगै मौद्रिक नीति आउन ढिला भएको छ । सरकारले बजेटमा परिवर्तन गर्ने संकेत गरेपछि नेपाल राष्ट्र बैंकले मौद्रिक नीति ल्याउन ढिलाइ गरेको हो ।

अर्थमन्त्रालयले सरकारको निर्णय कुर्न भनेपछि नेपाल राष्ट्र बैंकले तयारी अवस्थामा रहेको मौद्रिक नीति प्रस्तुत गरेन । मन्त्रिपरिषद् विस्तारमा भएको ढिलाइ तथा सदनमा अंकगणितका कारण पुरानै बजेटले निरन्तरता पाउने अवस्था भएपछि मौद्रिक नीति प्रस्तुत गर्ने तयारी भएको हो ।

अर्थमन्त्री जनार्दन शर्माले नेपाल राष्ट्र बैंकको स्वायत्तामा हस्तक्षेप नगरेको बताएपछि नेपाल राष्ट्र बैंक मौद्रिक नीति ल्याउनका लागि कसिएको छ । मौद्रिक नीतिको सन्दर्भमा पूर्वगभर्नरहरुसँग अन्तर्क्रियामा उनीहरुले सरकारको बजेटलाई पर्खेर बस्न हुन्न भन्दै चाँडो मौद्रिक नीति प्रस्तुत गर्न सुझाव दिएका थिए ।

अर्थमन्त्रालयमा सचिव हेरफेरले पनि मौद्रिक नीति यही साताभित्र आउने आँकलन बढेको छ ।  अर्थसचिव नेपाल राष्ट्र बैंकको सञ्चालक समितिमा पदेन सदस्य रहने भएकाले उनले मंगलबार सपथ लिँदैछन् ।

नेपाल राष्ट्र बैंकका प्रवक्ता देवकुमार ढकालले यो साताभित्र मौद्रिक नीति ल्याउने गरी तयारी अगाडि बढिरहेको बताएका छन् । ‘हामीले यही साता ल्याउने भन्ने सोचका साथ तयारी गरिरहेका छौं ’,उनले भने ।अर्थमन्त्रालयले हस्तक्षेप नगरेमा बिहीबार र शुक्रबार सम्ममा मौद्रिक नीति ल्याउने तयारी राष्ट्र बैंकले गरेको स्रोतले बताएको छ ।