काँग्रेस नेता रामहरि खतिवडाको टिप्पणी : ‘एमाले नेता महेश बस्नेत दिउँसै गाँजा खाएर बोल्न थालेका छन्, कांग्रेस फुटाउने रे’

काठमाडौं । नेपाली कांग्रेसका युवा नेता रामहरि खतिवडाले  एमालेका नेता तथा पूर्वमन्त्री महेश बस्नेत दिउँसै गाँजा खाएर बोल्न थालेको टिप्पणी गरेका छन्। 

कांग्रेस नेता खतिवडाले सामाजिक सञ्जालमार्फत् यस्तो टिप्पणी गर्दै भनेका छन्–‘महेश बस्नेत भन्ने पूर्वमन्त्री र माननीय दिउँसै गाँजा खाएर गफ दिन थालेछन्। कांग्रेस फुटाउने रे ? आफ्नो पार्टी दुईतिहाइबाट अल्पमतमा पुगेर आफैंले एमालेबाट केही नेतालाई (माझ समुह) हटाइएको अनि राष्ट्रपतिको सहाराले अध्यादेशमा अपहरणमार्फत देश चलाएको बिर्से कसो ? अपहरण बन्द गर ?’

एमाले नेता बस्नेतले नेपाली कांग्रेस पार्टी फुटाइदिने हैसियत भएको टिप्पणी सञ्चारमाध्यममा आएपछि नेता खतिवडाले यस्तो प्रतिक्रिया व्यक्त गरेका हुन्। सोमबार आयोजित युवा संघको कार्यक्रममा नेपाली कांग्रेस र नेकपा माओवादी केन्द्रलाई फुटाइदिने नेता बस्नेतले चेतावनी दिएका थिए।