रहेनन् वामपन्थी चिन्तक माणिकलाल श्रेष्ठ

काठमाडौँ । लामो समयदेखि मिर्गौला र मुटु रोगको समस्याबाट पीडित वामपन्थी चिन्तक माणिकलाल श्रेष्ठको ८९ वर्षको उमेरमा निधन भएको छ । 

श्रेष्ठको महाराजगन्जस्थित सहिद गंगालाल हृदय केन्द्रमा उपचारको क्रममा मंगलबार बिहान निधन भएको हो ।

कम्युनिस्ट विचारधाराका श्रेष्ठले मार्क्सवादबारे गहन अध्ययन गरेका थिए । तीक्ष्ण स्मरणशक्ति भएको श्रेष्ठ इतिहासका तिथिमिति यकिनसाथ भन्न सक्थे । स्वर्गीय श्रेष्ठ २०१४ सालमा काठमाडौं नगरपालिका–९ (हाल काठमाडौँ महानगरपालिका–१७) ठहिटीमा वडाध्यक्षमा निर्वाचित भएका थिए । उनले स्थानीय तहमा मातृभाषा लागू गराएका थिए । 

माणिकलाल पत्नी सुशाीला सिंह‘शिलु’ (सर्वोच्च अदालतको पहिलो महिला न्यायाधीश) को गत जेठ ९ गते निधन भएको थियो । माणिकलालका दुई छोरा वरिष्ठ कार्डिओलोजिस्ट डा. मलखलाल श्रेष्ठ र चिकित्सक डा. सितुलाल श्रेष्ठ छन् । जेठो छोरा विदेशमा रहेकाले उनी फर्किएपछि श्रेष्ठको अन्त्येष्टि गरिने परिवारले जनाएका छन् ।

‘माणिकलाल श्रेष्ठ बहुआयामिक व्यक्तित्व हुनुहुन्थ्यो,’ अधिकारवादी नेता मल्ल के सुन्दर भन्छन्, ‘वामपन्थी विचारक, इतिहासका सूक्ष्म ज्ञाता, विज्ञानका ज्ञाता, कानुनका ज्ञाता, नेपालभाषाका समालोचक, मातृभाषा अभियन्ता, विश्वविद्यालयका प्राध्यापक भनेर चिनिनु हुन्थ्यो ।’