कुखुरापालन व्यवसायमा जम्दै गैँडाकोटकी इन्दु

चितवन । पोथी बासेको सुहाउँदैन भन्ने नेपाली समाजको गलत कथन सुन्दै हुर्केका नेपाली महिलाहरुका लागि घर परिवारको दायित्व सम्हालेर सफल उद्यमी बन्न निकै चुनौतिको बिषय छ । काम गर्ने ईक्छाशक्ति र जाँगर भयो भने ब्यवसायमा पुरुषभन्दा महिला बढी सफल भएका उदाहरण छन् । घरयासी कामको बोझ र पारिवारिक दायित्व बढी भएका कारण पनि नेपालमा महिलाहरु नै नेतृत्वमा रहेर उद्योग ब्यवसाय गर्नेको संख्या निकै थोरै छ ।

जति महिलाले पारिवारिक झमेलालाई सहज रुपमा समाधान गर्दै आफूलाई उदाहरणीय बनाउने उद्देश्यका साथ कडा मेहनत गरेर उद्यम गरेका छन् उनीहरु साँच्चै सफल र उदाहरणीय बनेका छन् । घर परिवार ईस्टमित्र छरछिमेकी समाजको सबैको मनोभावनालाई आत्मसात गर्दै ब्यवसायमा लागेर अगाडि बढेर सफल उद्यमी बन्न महिलाका लागि फलामकै चिउरा चपाउनु सरह हुन्छ । जति महिलाले सबै चुनौतिको सामना गरेर निरन्तर अगाडि बढे उनीहरु सबै हिसाबले सफल बनेका छन् ।

गैँडाकोट ४ झपर्दी शिबालय टोलकी ईन्दु घिमिरे पनि यस्तै एउटा साहसी र प्रेरणादायी महिला हुन् । लामो समय इजरायल बसेर जीवन के हो, कसरी श्रम गर्नु पर्छ र सफलता कसरी हात लाग्छ भन्ने कुराको भित्री रहस्य आत्मादेखि अनुभूति गरेकी घिमिरेले आफ्नै घरमा ३ हजार कुखुरा अट्ने खोर निर्माण गरेर लोकल जातका कुखुरा पालेकी छिन् ।

ईन्दु लोकल पोल्टी फार्मको नामबाट फर्म दर्ता गरेर उनले लोकल जातका घाँटीखुईले, रातो, कालो, कडकनाथ र स्याखिनी जातका कुखुरा पाल्दै आएकी छिन् । १५ वर्ष ईजरायल बसेर ७३ सालमा स्वदेश फर्किएर सुरुको वर्ष ५०० कुखुराबाट कारोबार सुरु गरेको र अहिले बार्षिक ४० लाखको कारोबार हुने गरेको उनले बताइन् । 

आफूले आफ्नो बुद्धि र बिबेकबाट श्रम गरेर पैसा कमाएर घर चलाउँदा निकै खुसी र गौरव लाग्ने गरेको उनको भनाई छ । अहिले उनको खोरमा ७०० माउ र करिव ३०० जति भाले गरी १ हजार कुखुरा छन् । पोथीहरुले फुल पारेका छन् भने त्यो फुललाई ह्याचलिङ गरी चल्ला समेत निकालेर बिक्री गर्ने गरेको र कुखुराको अण्डा पनि बिक्री गर्ने गरेको उनको भनाई छ ।

उनको फार्ममा कुखुराको चल्ला तथा अण्डा लिन गोरखा, लमजुङ, तनहुँ, चितवन, मकवानपुर लगायत धेरै जिल्लाबाट मानिसहरु पुग्ने गरेका छन् । भालेलाई ६ सय रुपैया किलो र पोथी ५ सय रुपैया किलोमा बिक्री गर्ने गरेको उनले बताइन् । घरमा छोराछोरी र परिवारलाई खाना पकाउने खुवाउने समाजमा बिभिन्न कार्य हुँदा उपस्थित हुने सरसहयोग गर्नेदेखि खोरमा रहेका १ हजार कुखुरालाई दाना पानी औषधी उपचार स्याहार सुसार सबै काम गर्न उनलाई अहिले भ्याईनभ्याई छ । घिमिरे राष्ट्रिय धावक समेत हुन् । उनी बिदेशका बिभिन्न दौड प्रतियोगितामा सहभागिता जानाउँदै मेडल जित्न सफल भएकी छन् ।

घिमिरे खेल जीवनको दौड छाडेर अहिले सफल उद्यमी बन्ने ब्यावसायिक जीवनको दौडमा हुइँकिएकी छन् । पोल्टी फार्मसंगै उनले गैँडाकोट ५ काँग्रेस चोकमा ईन्द्रादिप योगा एण्ड जुम्बा स्टुडियो पनि सञ्चालन गरेकी छन् । अहिले त्यहाँ पनि समय ब्यवस्थापन गर्न उनलाई भ्याईनभ्याई छ । माघ १ गतेदेखि सञ्चालनमा आएको योगा स्टुडियोमा दैनिक ५ वटा कक्षा सञ्चालन हुने गरेको छ भने दैनिक १०० भन्दा बढी योग कक्षामा सहभागी हुने गरेका छन् । बच्चादेखि बृद्धबृद्धा र युवाहरु योग कक्षामा सहभागी भएका छन् । 

आफू खेलाडी भएको र ध्यान र योगले नै मानिसलाई स्वस्थ राख्ने भएकाले गैँडाकोटबासीलाई तन, मन र शारीरिक रुपमै स्वस्थ बनाउन आफूले योगा स्टुडियो सञ्चालन गरेको घिमिरे बताउँछिन् । योग स्टुडियोमा बरिष्ठ प्रशिक्षक डा अमन दिप शिंह र डा.मुकुल भारद्वाजले योग सिकाउँछन् ।