डा. केसीका मागमा नेपाली कांग्रेसको ऐक्यवद्धता

काठमाडौँ । नेपाली कांग्रेसले डा. गोविन्द केसीले राखेका मागहरु जायज भएको भन्दै ऐक्यवद्धता जनाएको छ । 

कांग्रेस प्रवक्ता विश्वप्रकास शर्माले डा. केसीको मागहरुमा समर्थन जनाउँदै कांग्रेसले औपचारिक रुपमा विज्ञप्ती जारी गरिसकेको बताए । केन्द्रीय कार्यसमितिको बैठकबाटै थप निर्णय गरी एैक्यवद्धता जनाउने तयारी भइरहेको पनि उनले बताए । 

सोमबार बस्ने भनिएको केन्द्रीय कार्य समितिको बैठक कोरोना संक्रमण जोखिमका कारण बस्ने/नबस्ने सम्बन्धमा आजै पार्टीले निर्णय गर्ने पनि उनले बताए । कार्यसमिति बैठक बस्नुअघि आजका लागि बोलाइएको पदाधिकारी बैठक भने स्थगित भइसकेको उनले जानकारी दिए । 

केन्द्रीय कार्यसमिति बैठक बस्ने वा नबस्ने सम्बन्धमा सबै कार्यसमिति सदस्य र सचिवालय सदस्यहरुको पीसीआर परीक्षणको रिपोर्ट आएपछि मात्रै निर्णय हुने उनले प्रस्ट पारे । 

डा. गोविन्द केसीले विगतदेखि नै जायज माग राख्दै आएका र कांग्रेस नेतृत्वको सरकारका पालामा भएका सम्झौता कार्यान्वयन भए अधिकांश मागहरु पूरा हुने उनले बताए । पछिल्लो समय डा. केसीले पीसीआर परिक्षण बढाउने र कर्णाली स्वास्थ्य विज्ञान प्रतिष्ठानको सन्दर्भमा नयाँ जायज माग राखेकाले सरकारले तत्काल वार्ता गरी सुनुवाई गर्नुपर्ने उनको भनाई छ ।

संसदको विशेष अधिवेशन बोलाउने सन्दर्भमा कांग्रेसले औपचारिक निर्णय गरिनसकेको प्रवक्ता शर्माले बताए । भौतिक दुरी कायम राखेर संसद अधिवेशन चलाउनुपर्ने उनले बताए । विदेशबाट नेपालीहरु फर्कन नपाएको अवस्था, चाडपर्वमा बजारमा हुने महँगी, अस्पतालमा उपचार नपाएर मृत्युवरण गर्नुपर्ने अवस्था लगायतका विषयमा सरकारले संसद अधिवेशन बोलाएर नागरिकका कुरा राख्न मार्गनिर्देश गर्नुपर्ने उनले बताए । यो विषयमा पनि केन्द्रीय कार्यसमितिले औपचारिक निर्णय गर्नेपनि प्रवक्ता शर्माले बताए ।