महोत्तरीका दुई जनामा मृत्युपछि कोराना संक्रमण पुष्टि

जनकपुर । महोत्तरीमा थप २ जना कोरोना संक्रमितको मृत्यु भएको पुष्टि भएको छ । 

शनिबार महोत्तरीको भंगहा नगरपालिका वडा नम्बर १ बस्ने एक ३५ वर्षीय पुरुष र पिपरा गाउँपालिका वडा नम्बर ७ बस्ने ७० वर्षीय पुरुषमा मृत्यु पछि कोरोना संक्रमण पुष्टि भएको प्रादेशिक अस्पताल जनकपुर अन्तर्गतको कोभिड १९ विशेष अस्पताल जनकपुरका प्रमुख डा। जामुन प्रसाद सिंहले जानकारी दिए  ।

उपचारको क्रममा बर्दिबासमा भर्ना रहेका पिपरा गाउँपालिकाका ७० वर्षिय पुरुषलाई थप उचपारको लागि शनिबार बिहान जनकपुरस्थित प्रादेशिक अस्पताल ल्याइएपछि बिहानै उनको मृत्यु भएको डा। सिंहले बताए ।

उनले भंगहा नगरपालिकाका एक पुरुषको पनि उपचारकै क्रममा शनिबार बिहान प्रादेशिक अस्पताल जनकपुरमा मृत्यु भएको र मृत्यु पछि उनको कोराना परीक्षणको रिपोर्ट पोजेटिभ आएको बताए । 

हाल उनीहरुको शव प्रादेशिक अस्पताल जनकपुरमा राखिएको छ भने नेपाली सेनाबाट शव व्यवस्थापन गर्ने तयारी अस्पतालले जनाएको छ  । यससंगै महोत्तरीमा कोरोना संक्रमणबाट मृत्यु हुनेको संख्या ८ पुगेको छ ।