कोरोना संक्रमणबाट वीरगंजमा एक महिला सहित थप ३ जनाको मृत्यु

वीरगन्ज । कोरोना संक्रमणको हटस्पट मानिएको वीरगन्जमा एक महिलासहित थप ३ जना कोरोना संक्रमितको मृत्यु भएको छ ।

मृत्यु हुनेमा वीरगन्ज महानगरपालिका–१२ मुर्ली निवासी ६५ वर्षीया महिला, वीरगन्ज–१२ निवासी ४३ वर्षीय पुरुष र वीरगन्ज–२२ मनियारीका ३७ वर्षीय पुरुष रहेका छन् ।

संक्रमित मनियारीका ३७ वर्षीय पुरुषलाई वीरगन्ज हेल्थ केयरमा उपचार हुन नसकेपछि थप उपचारका लागि काठमाडौं लैजादैं गर्दा बाटोमै मृत्यु भएको अस्पतालले जनाएको छ ।  त्यस्तै वीरगन्ज–१२ का ४३ वर्षीय कोरोना संक्रमितको शुक्रबार राति ११ बजेर ५५ मिनेटमा उपचारको क्रममा वीरगन्ज हेल्थ केयर कोरोना अस्पतालमा मृत्यु भएको हो ।

नारायणी अस्पतालका प्रवक्ता डा.अतुलेश चौरसियाका अनुसार हेपाटाइटीस बी र एचआईभी एड्सका बिरामी रहेका ती पुरुष शुक्रबार साँझ नेसनल मेडिकल कलेजबाट रिफर भएर कोरोना अस्पताल आएका थिए ।

यसैगरी शुक्रबार साँझ वीगन्ज–१२ मुर्ली निवासी ६५ वर्षीया महिलाको नारायणी अस्पतालमा मृत्यु भएको हो । अस्पतालका अनुसार महिला उच्च रक्तचापको समस्याबाट पीडित थिईन् ।