नेपालमा थप ८ जनाको मृत्यु, १ हजार १११ जना संक्रमित भेटिए, ५६९ जना निको भए

काठमाडौं । नेपालमा थप ८ जना कोरोना संक्रमितको मृत्यु भएको छ । स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले आजको नियमित पत्रकार सम्मेलनमा सो जानकारी गराएका हुन् ।

मृतकहरुमा पाँच महिला र तीन जना पुरुष रहेका छन् । महिलाहरुमा ललितपुरकी ६५ वर्षीया, बाराकी २३ वर्षीया, कास्कीकी ३२ वर्षीया, रुपन्देहीकी ७० वर्षीया, बाँकेकी ७० वर्षीया छन् भने पुरुषहरुमा काठमाडौंका ४८ वर्षीय, पर्साका ६२ वर्षीय र कपिलवस्तुका ५० वर्षीय रहेका छन् ।

यससँगै नेपालमा मृत्यु हुने कोरोना संक्रमितको संख्या १८३ पुगेको छ । यस्तै आज थप १ हजार १११ जनामा कोरोना भाइरस संक्रमण पुष्टि भएको छ भने ५६९ जना निको भएर घर फर्किएका छन् । यस्तै हालसम्म नेपालमा कोरोना संक्रमितको संख्या ३५ हजार ५२९ पुगेको छ । जसमध्ये २० हजार ७३ जना निको भएर घर फर्किएका छन् ।