भारतमा कोरोना संक्रमणबाट २४ घण्टामा १ सय ७० जनाको मृत्यु, कूल संक्रमित संख्या १ लाख ५१ हजार ७ सय ६७

एजेन्सी । छिमेकी मुलुक चीनमा पहिलोपटक देखा परेको कोरोना भाइरसको संक्रमण अर्को छिमेकी मुलुक भारतमा तीब्र गतिमा उकालो चढिरहेको छ । भारतमा गएको २४ घण्टामा एक सय ७० जनाको मृत्यु भएको छ ।

भारतको केन्द्रीय स्वास्थ्य मन्त्रालयका अनुसार, भारतमा कोरोना भाइरसको संक्रमणबाट पछिल्लो २४ घण्टामा १ सय ७० जनाको मृत्यु भएको छ भने ६ हजार ३ सय ८७ जना संक्रमित थपिएका छन् ।

योसँगै भारतमा अहिलेसम्म १ लाख ५१ हजार ७ सय ६७ जना कोरोना संक्रमित भएका छन् । उनीहरुमध्ये ८३ हजारभन्दा धेरै संक्रमित अहिले अस्पतालमा उपचाररत छन् ।

भारतका विभिन्न ठाउँबाट ६४ हजारभन्दा केही बढी व्यक्ति उपचारपछि निको भएर अस्पतालबाट डिस्चार्ज भएका छन् । भारतको स्वास्थ्य सेवा विभागले अहिलेसम्म देशभर ४ हजार ३ सय ३७ जनाको कोरोना संक्रमणका कारण मृत्यु भएको जानकारी दिएको छ ।

भारतमा कोरोना संक्रमित र कोरोना संक्रमणबाट मृत्यु हुनेको संख्या बढेपछि नेपालमा खतराको घण्टी बजेको छ । पछिल्ला दिनहरुमा भारतबाट स्वदेश फर्केका नेपालीहरुको संख्या दैनिक पाँच हजारभन्दा बढी भएपछि नेपालमा खतराको घण्टी बजेको हो ।