बाख्रा चराउन जंगल गएका दुई किशोरी मृत भेटिए

सुर्खेत । अछामको ढकारी गाउँपालिका-८ पल्साताका दुई किशोरी मृत अवस्थामा फेला परेका छन् । बाख्रा चराउन शुक्रबार जंगल गएका उनीहरू शनिबार दिउँसो मृत फेला परेका हुन् ।  

वडा नम्बर आठका पूर्ववडाध्यक्ष लाल बहादुर भण्डारीका अनुसार १४ वर्षकी ईश्वरी खड्का र १५ वर्षकी सरस्वती खड्का जंगलमा मृत भेटिएका हुन् । उनीहरूको शव करिब १६ मिटरको दूरीको फरकमा फेला परेको हो । उनीहरू दुवैको शव रिमारह नजिकको छिर्ने ओडार नजिक फेला भण्डारीले बताए ।

‘अस्ति शुक्रबार दुवै बहिनीहरू (एकै परिवार भित्रका) बाख्रा चराउन भनेर जंगलतिर गएका रहेछन् । उनीहरू राति अबेरसम्म नआएपछि पोइल (भागी बिहे) गए कि भन्ने परिवारलाई लाग्यो ।  गाउँमा अहिले पनि भागेर विवाह गर्ने चलन कायमै छ । त्यही कारण परिवारले उनीहरूको सबै इष्टमित्र भएको स्थानमा सोधी खोजी गर्न लागे’, पूर्ववडाध्यक्ष भण्डारीले भने, ‘कतैपनि उनीहरू भेटिएनन् । शनिबार दिउँसो साढे तीन बजेतिर ढकारी गाउँपालिकाको वडा नम्बर १ र आठको सिमाना पर्ने स्थानमा शव भेटिएको खबर आयो । सोही खबर अनुसार हेर्न जाँदा हामीले ती दुवै किशोरी भएको थाहा पायौं ।’

उनीहरू कमल बजार नगरपालिका-१० मा रहेको विद्याज्योति माविमा कक्षा ८ अध्ययनरत थिए । मृत भेटिएका दुवै किशोरीको शरीरमा चोटपटकको निशाना देखिएको भण्डारीले बताए । 

जिल्ला प्रहरी कार्यालय अछामका डीएसपी ईश्वरी प्रसाद भण्डारीले आफू अहिले घटनास्थलमा रहेको बताए । 

‘शव भेटिएको स्थानको माथितिर ढुंगैढुंगाको ठूलो भीर छ । त्यहाँबाट खसेको हुनसक्ने प्रारम्भिक बुझाइ पनि छ’, डीएसपी भण्डारीले भने, ‘तर अहिले केही भन्न सकिने अवस्था छैन । हामीले कोहलपुरबाट तालिमप्राप्त कुकुर मगाएर अनुसन्धान शुरू गरिसकेका छौं ।’