खेतीयोग्य जमीन बाँझो राख्न नपाइने

चिप्लेढुङ्गा । पोखरा महानगरपालिका–३० ले कृषि भूमि खाली नराख्न वडावासीलाई आग्रह गरेको छ । बन्दाबन्दीपछि खाद्य सङ्कट आउन सक्ने भन्दै वडा समितिको बैठकले वडाभित्र जग्गा रहेका धनीलाई कृषि उत्पादनसँग जोड्नसमेत आग्रह गरेको हो ।

बाँझो राखेमा त्यस्तो जग्गा खेती गर्न चाहनेलाई उपलब्ध गराइने पनि वडा समितिले निर्णय गरेको  वडाध्यक्ष श्रीराम पोखरेलले जानकारी दिनुभयो । “हामी सकभर सम्बन्धित जग्गाधनीलाई नै खेती गर्न आग्रह गर्छौँ, उहाँहरुले नमाने खेती गर्न चाहनेलाई उपलब्ध गराउँछौँ”, उहाँले भन्नुभयो, “हाम्रो उद्देश्य खेतीयोग्य जमिन बाँझो नरहोस् भन्ने नै हो ।”

उहाँका अनुसार वडामा दुई हजारभन्दा बढी रोपनी जग्गा रहेको एक सिजनको खेतीपछि बाँझो रहने गर्दछ   । उहाँले  पहिला जग्गाधनीलाई आग्रह गरिने, जग्गाधनीले नगरे नजिकका सधियारलाई भनिने र सधियारले पनि नमाने वडालाई सूचना दिएर जसले पनि खेती गर्न सक्नुभयो । जग्गाधनी र खेती गर्नेका बीच विवाद भए वडाले सहजीकरण गर्ने उहाँको भनाइ थियो ।

उहाँका अनुसार टोल विकास संस्थामार्फत एक हप्ताभित्र बाँझो जग्गाको लगत तयार गरिनेछ ।  विज्ञहरुसँग छलफल गरेर आधुनिक तरिकाबाट कृषि उत्पादन बढाउने विषयमा छलफल गर्ने तयारी भइरहेको छ । विगतका तीन वर्षका बजेटमा भौतिक पूर्वाधारलाई जोड दिइएको उल्लेख गर्दै, उहाँले आगामी दुई वर्षको योजनामा कृषि र रोजगार सिर्जनालाई समेटिने बताउनुभयो । (रासस)