लकडाउन  थप कडाइ : मुख्यमन्त्री गुरुङ

काठमाडौं । गण्डकी प्रदेशका मुख्यमन्त्री पृथ्वीसुब्बा गुरुङले कोभिड–१९ को सङ्क्रमण रोक्न जारी बन्दाबन्दीलाई प्रदेशमा थप कडाइ गरिने बताउनुभएको छ । 

लमजुङ–पोखरा सम्पर्क समाजद्वारा स्थापित लमजुङ–पोखरा बचत तथा ऋण सहकारी संस्था लिमिटेडले पोखरामा समस्यामा परेकालाई आज आयोजना गरेको राहत वितरण कार्यक्रममा उहाँले मानवको पहिलो प्राथमिकता स्वास्थ्य भएकाले पछिल्लो समय फैलिएको सङ्क्रमणको अवस्थालाई हेरेर बन्दाबन्दीलाई कडाइ गर्न लागिएको जानकारी गराउनुभयो । 

अहिलेको सङ्कट व्यवस्थापनको पहिलो र प्रभावकारी उपाय बन्दाबन्दी मात्र भएकाले सरकारले नागरिकलाई थप सचेत बनाउँदै लकडाउनलाई कडाइका साथ पालना गर्न लगाइने उहाँले उल्लेख गर्नुभयो । मुख्यमन्त्री गुरुङले भन्नुभयो, “मानिसहरु पहिले घर जान हतारिए र अहिले फेरी आउन हतारिएका छन्, लकडाउन भनेको जो जहाँ छ, त्यही बस्ने हो, खान नपाए बरु सरकारसँग माग गर्ने हो, लकडाउनको विकल्प छैन ।” 

प्रदेश सरकारका मुख्य न्यायाधिवक्ता डा राजेन्द्र घिमिरेले सरकारको लक्ष्यअनुसार कृषि क्षेत्रमा लगानी गर्न सहकारी संस्थाहरुलाई आग्रह गर्नुभयो । सम्पर्क समिति तथा सहकारीको सहकार्यमा लकडाउनका कारणले अप्ठ्यारोमा परेका लमजुङवासी २८ नागरिकलाई चामल, दाल, तेललगायत खाद्यान्न राहतस्वरुप वितरण गरिएको सम्पर्क समितिका सचिव माधव पनेरुले जानकारी दिनुभयो ।