महोत्तरीमा अज्ञात समूहको गोली प्रहारबाट एक जना घाइते

महोत्तरी । महोत्तरीको मनरा सिसवा नगरपालिका वडा नम्बर ३ मा अज्ञात समूहले गोली प्रहार गर्दा स्थानीय ६१ वर्षीय सौर्यप्रसाद यादव घाइते भएको जिल्ला प्रहरी कार्यालय महोत्तरीका प्रहरी नायव उपरीक्षक माधवप्रसाद बुढाथोकीले जानकारी दिए ।

डीएसपी बुढाथोकीले घटनाको पुष्टि गर्दै शौचालय जान निस्केका बेला यादवमाथि गोली प्रहार भएको जानकारी दिए । गोली  यादवको छातीमुनि लागेको छ । घाइते यादवको जनकपुरस्थित जानकी हेल्थ केयरमा उपचार भइरहेको छ । 

बुढाथोकी नेतृत्वको प्रहरी टोलीले घटनास्थलकबाट चाइनिज पेस्तोलकाे दुई राउण्ड गोलीका खोका र एक राउण्ड गोली बरामद गरेको छ ।

ज्वाईँ पक्राउ
गोली प्रहार गरेको आरोपमा गोली लागेर घाइते भएका व्यक्तिका ज्वाईँलाई प्रहरीले पक्राउ गरेको छ । ज्वाईँमाथि शंका लागेकोले पक्राउ गरेर अनुसन्धान सुरु गरिएको महोत्तरीका प्रहरी नायव उपरीक्षक माधवप्रसाद बुढाथोकीले जनाएका छन् ।

आइतबार बिहान शौचालय जान घरबाट निस्केको बेला मनरासिसवा नगरपालिका वडा नम्बर ३ का सहदेवप्रसाद यादव माथि गोली प्रहार भएको हो । घाइतेका ज्वाईँ औरही नगरपालिका–१ बस्ने सन्तोष यादवलाई प्रहरीले पक्राउ गरेको हो । रिटायर्ड शिक्षक रहेका ससुरासँग पाँचद्ध लाख रुपैयाँ मागेको र नदिँदा पटक–पटक धम्की दिएको प्रारम्भिक अनुसन्धानको क्रममा खुलेको प्रहरीले जनाएको छ ।