थाइल्याण्ड भ्रमण अत्यन्त सफल र फलदायी रह्यो: प्रधानमन्त्री ओली

सफल खबर संवाददाता

शनिबार, २३ चैत्र २०८१, १३ : २३
थाइल्याण्ड भ्रमण अत्यन्त सफल र फलदायी रह्यो: प्रधानमन्त्री ओली

काठमाडौं। प्रधानमन्त्री केपी शर्मा ओलीले आफ्नो थाइल्याण्ड भ्रमण अत्यन्त सफल र फलदायी रहेको दाबी गरेका छन् । बिमस्टेक शिखर सम्मेलनमा भाग लिएर शनिबार स्वदेश फर्किएका प्रधानमन्त्री ओलीले त्रिभुवन अन्तर्राष्ट्रिय विमानस्थलमा सञ्चारकर्मीसँग कुरा गर्दै भ्रमणले दुई देशबीचको सम्बन्ध थप बलियो बनाउन सहयोग पुगेको बताए ।

‘बिमस्टेकमा सहभागी विभिन्न देशका प्रधानमन्त्रीसँग छुट्टाछुट्टै शिष्टाचार भेटवार्ता गरेँ । सबैसँग दुई देशको सम्बन्ध सुधार गर्नेसहित आपसी सहयोग र सहकार्य गर्ने कुरामा सहमति भएको छ । समग्रमा मेरो भ्रमण अत्यन्त सफल र फलदायी रह्यो’, प्रधानमन्त्री ओलीले भने ।

बिमस्टेक सम्मेलनका क्रममा नेपालमा लगानीको वातावरण रहेको र सम्भावना रहेको चर्चा गर्दै व्यवसायीलाई लगानी गर्न आह्वान गरेको प्रधानमन्त्री ओलीले बताए । विदेशी लगानीकर्ताहरूले नेपालमा लगानी गर्न इच्छा देखाएको उनले बताए ।

उनले भ्रमणका क्रममा दुई पक्षीय सम्बन्ध सुदृढ गर्नुका साथै आपसी सहयोग र सहकार्य अगाडि बढाउने सहमति भएको पनि उल्लेख गरे । प्रधानमन्त्री ओलीले थाइल्याण्डका प्रधानमन्त्री पे थोङ् थान् सिनावातलाई नेपाल भ्रमणको निम्तो दिइएको जानकारी दिँदै चाँडै नै सिनावातको नेपाल भ्रमण हुने आशा राखेको बताए । 

उनले नेपालका तर्फबाट प्रधानमन्त्रीस्तरीय पहिलो थाइल्याण्ड भ्रमण रहेको उल्लेख गर्दै ओलीले भ्रमणले दुई देशको मित्रता र सद्‌भाव थप अभिवृद्धि गर्ने र आर्थिक सम्बन्धको दायरा विस्तारमा सहयोग पुगेको बताए ।

‘थाइल्याण्डमा दुईपक्षीय वार्ता पनि भयो । जसमा आपसी हितका विषयमा फलदायी छलफल भयो । दुई देशबीचको सम्बन्ध थप बलियो बनाउन सहमति भएका छन्’, प्रधानमन्त्री ओलीले भने, ‘समृद्ध नेपाल, सुखी नेपालीको आकांक्षा पूरा गर्न थाइल्याण्डले सहयोग गर्ने प्रतिवद्धता जनाएको छ ।’

प्रतिक्रिया दिनुहोस