राप्रपा र राप्रपा नेपालको नेता अब दुर्गा प्रसाईं !

काठमाडौं । अन्ततः पूर्व पञ्चहरुको राजावादी पार्टी राप्रपा र राप्रपा नेपाल दुबैका पनि नेता बनेका छन् विवादास्पद ब्यापारी दुर्गा प्रसाईं । पूर्व राजाले नै प्रसाईंलाई आफुलाई फर्काउन आन्दोलन गर्ने गरी कमाण्डर बनाउन जिम्मा लगाएपछि अन्ततः राप्रपा र राप्रपा नेपालका पनि नेता बनेका हुन्, दुर्गा प्रसाई ।

आफुलाई जन्मजात कटटर राजावादी बताउने पूर्व पञ्चहरुका पार्टी नेता नै प्रसाईलाई आन्दोलन परिचालनको कमाण्डर बनाएर अगाडी बढ्नुपर्ने स्थिती आएपछि राजावादीहरुमा छट्पटी मच्चिएको छ ।

८६ वर्षिय नवराज सुवेदीको नेतृत्वमा ‘राजसंस्था पुनस्र्थापनाका लागि संयुक्त जनआन्दोलन समिति’ बनाएको राजावादी समुहले प्रसाईंलाई कमाण्डर तोकेपछि भित्रभित्र मुरमुरिएरै भएपनि राप्रपा र राप्रपा नेपालले प्रसाईंलाई नेता मानेर हिडन तयार भएका छन् ।

यधपी यसले राजावादीहरुभित्रै असन्तुष्टिको आगो भने सल्केको छ । राजावादी पार्टी राप्रपामा प्रष्ट विभाजन देखिएको छ । राप्रपा नेताहरु धबलशम्शेर जवरा, प्रकाशचन्द्र लोहनी लगायतका नेताहरुको एउटा कित्ता सुवेदी र प्रसाईंलाई नेता मानेर अगाडी जा नतायर देखिएका छन् । तर, राप्रपा अध्यक्ष राजेन्द्र लिङदेन र राप्रपा नेपालका अध्यक्ष कमल थापा भने भित्र वेचनीमा रहेरै भएपनि प्रसाईंले घोषणा गर्ने कार्यक्रममा समर्थन गर्ने तर नेता नमान्ने बताईरहेका छन् । जसले राजावादी पूर्वपञ्चहरुको पार्टी राप्रपा र राप्रपा नेपालमा भित्रभित्र भाँडभैलो देखिएको छ ।

राप्रपाले आफनो नेतृत्वमा भने चैत २६ गते बागमती स्तरीय प्रर्दशन गर्ने गरी कार्यक्रम बनाएको छ । आजको कार्यक्रम भने प्रसाईले बनाएका हुन् । दुबैलाई एक अर्काको सहयोग चाहिने र मान्छे देखाउनु पर्ने देखेपछि असन्तुष्ट भएपनि एक अर्कालाई सहयोग गर्ने नीति बनाउन लागिएको राप्रपाका नेता बुद्दिमान तामाङको भनाई छ ।

सुवेदीले प्रसाईंलाई बिहिबारको एक कार्यक्रममार्फत कमाण्डर तोकेका हुन् । प्रसाईंलाई कमाण्डर तोक्ुन अगाडी दुवैले पूर्व राजा ज्ञानेन्द्रसँग अलग अलग भेट गरेका थिए । निर्माल निवासमा ज्ञानेन्द्रसँग भेट गरेर फर्केपछि सुवेदीले प्रसाईंलाई आन्दोलनको कमाण्डर तोकेका हुन् । त्यसपछि भने राप्रपा र राप्रपा नेपालमा खैलाबैला मच्चिएको हो ।

‘नमानु पूर्व राजाले नै अगाडी बढाएको देखिन्छ, मानौं, राप्रपा र राप्रपा नेपाललाई प्रसाईंले ढोक्सा थाप्न आएको जस्तो आरोप लगाईरहेका छन्, ’ राप्रपाका एक पदाधिकारीले सफलखबरसँग भने, ‘राजाले नै प्रसाईंजस्तो ब्यक्तिको काँधमा चढ्न खोजेपछि आन्दोलन केही दिनको रिमझिम हुने मात्र देखियो । यो पूर्व राजाकै लागि पनि प्रत्युत्पादक बन्नेछ ।’

प्रसाईंले राप्रपा र राप्रपा नेपालका नेताहरुलाई ‘हलि’सँग तुलना समेत गर्ने गरेका छन् । ‘म राजासँगै मिलेर काम गर्न चाहन्छु, हलीसँग मिलेर सडक आन्दोलनमा किमार्थ जान्नँ, म कसैको हलीहरूसँग सहकार्य गर्न किमार्थ तयार रहँदिनँ। सबैलाई चेतना भया,’ प्रसाईंले केही दिन अगाडी एक पत्रकार सम्मेलनमा राप्रपा र राप्रपा नेपालका नेताहरुलाई आफु नेता रहेको भन्दै भनेका थिए, ‘आजको राजसंस्थाविहीन जर्जर नेपाल यसै बनेको होइन। २०७२ सालमा संविधान घोषणा हुने बेला राप्रपाका दुई नेताहरू कमल थापा र राजेन्द्र लिङ्देनले हस्ताक्षर नगरेको भए आज हाम्रो सनातन धर्म मासेर धर्मनिरपेक्ष राज्य हुने थिएन, राजादेखि माओवादीसम्म अट्ने व्यवस्था हुने थियो।’

राप्रपा र राप्रपा नेपालका नेताहरुलाई मञ्चमै राखेर प्रसाईंले ठेगान लाग्ने गरी कटाक्ष र आरोप लगाईरहँदा पनि दुवै पार्टीका नेताहरु निरिह बनेर बस्नुपर्ने अवस्था आएको छ । ‘प्रसाईं जीले आफै आफनो विवादास्पद छबि हेर्नु छैन, हामीमाथी आरोप लगाउनु हुन्छ । तैपनि हामी मञ्चमै बसेर पनि टुलुटुलु हेरेर बस्नुपर्ने निरिह अवस्था जन्मिएको छ, यस्तो दासताबाट आन्दोलनले कसरी पार लाग्ला ? राजाले पनि कसरी आफु पूर्नस्थापित हुने सोचेका होलान् ? विचरणणिय विषय छ, ’ राप्रपाका एक पदाधिकारी बताउँछन् ।

प्रसाईंलाई राजावादी आन्दोलनको कमाण्डर तोकेपछि असन्तुष्टी ब्यक्त गदैं राप्रपाका ती पदाधिकारीले सफलखबरसँग भने,  ‘पार्टीहरूलाई पाखा लगाउनका लागि यो प्रपञ्च रचिएको हो कि भन्ने हाम्रो आशंकामा बल पुगेको छ । यो निर्णय सही होइन भन्नेमा आमपार्टीपंक्ति सहमत छ ।’

सतहमा उग्र विवादमा नदेखिएपनि यसले राप्रपा र राप्रपा नेपालभित्रै भाडभैलो निम्ताउने भने देखिएको छ ।