नेपाली सेनाले किन बोलायो अमेरिकाका यी चार सैनिक ?

काठमाडौं । नेपाली सेनाको निम्तोमा चार जना अमेरिकी उच्च सैनिक अधिकारी नेपाल भ्रमणमा आएका छन् । नेपाल भ्रमणमा आउने चारै जना अमेरिकीहरु त्यहाँको सेनाका जिम्मेवार र विज्ञ अधिकारीहरु रहेको नेपाली सेनाले जनाएको छ ।

नेपाली सेनाको निम्तोमा नेपाल आएका चार अमेरिकी सैनिक अधिकारीहरुमा जोसेफ अल्थोस, बबी रे ग्कर्डन, बेरार्ड केरी र रोबर्ट होलब रहेका छन् ।

उनीहरु शनिबार दिउँसो काठमाडौं अवतरण गरेका थिए । अमेरिकी सेनामा रहेर युद्द कौशलमा पोख्त रहेका ती चार अमेरिकी उच्च सैनिक अधिकारीहरु शनिबार दिउँसो TG319 नम्बरको थाइ एयरबाट काठमाडौं अवतरण गरेका हुन् ।

उनीहरुलाई नेपाली सेनाले विमानस्थलमा स्वागत गरेको थियो । उनीहरु झण्डै १५ दिन नेपालमा रहने बताइएको छ । नेपाली सेना र अमेरिकी इन्डोपाकम (U.S. Indo-Pacific Command – INDOPACOM) को संयुक्त आयोजनामा सोमबारबाट काठमाडौंमा ‘एक्सपट एकेडेमिक डिसकसन’हुन लागेको छ । यही छलफलमा भाग लिन उनीहरु नेपाल आएका हुन् ।

यो छलफल चैत १४ गतेसम्म चल्ने जनाइएको छ । काठमाडौंको होटल याक एण्ड यतिमा चल्ने यो खालको छलफलमा नेपाली सेना तथा अमेरिकाबाट आएका यी चार उच्च सैनिक अधिकारीहरुको सहभागिता रहने छ ।

यो खालको कार्यक्रम यस अगाडी पनि भएको सेनाको भनाई छ । MPAT TE 40 अन्र्तगत दुवै देशका सैन्य अधिकारीका विज्ञ सम्मिलित छलफल काठमाडौंमा हुन लागेको हो । यसलाई टेवल टप एक्सरसाइजका रुपमा पनि दुवै देशका सेनाका अधिकारीहरुले लिएका छन् ।

‘एक्सपट एकेडेमिक डिसकसन’ नेपाली सेना र अमेरिकी इन्डोपाकमको संयुक्त आयोजनामा हुने एउटा विशेष कार्यक्रम हो। यो कार्यक्रममा सैन्य रणनीति, सुरक्षा अध्ययन, र क्षेत्रीय सुरक्षा मामिलामा विशेषज्ञहरूसँगको छलफलका लागि आयोजना गरिन्छ।

यसको मुख्य उदेश्य भनेकै द्विपक्षीय सैन्य सहकार्य सुदृढ गर्ने, सामरिक ज्ञान आदानप्रदान गर्ने र क्षेत्रीय सुरक्षा मामिलामा विशेषज्ञहरूसँग छलफल गर्ने रहेको बताइएको छ ।

नेपाल आएका जोसेफ शान्ति स्थापना, मानवीय सहायता, विपद् प्रतिक्रियाका लागि विज्ञ मानिन्छन् । बबी रे ग्कर्डन टेक्निकल सोलुसन्समा बहुराष्ट्रिय योजनाकार मानिन्छन् ।