यस्ता छन् आइतबारको मन्त्रिपरिषद् बैठकका निर्णयहरु

काठमाडौँ । आइतबार प्रधानमन्त्री निवास बालुवाटारमा बसेको मन्त्रिपरिषद् बैठकले विभिन्न निर्णयहरु गरेको छ । बैठकले राष्ट्रपति विद्यादेवी भण्डारीको कतार भ्रमण स्वीकृत गरेको छ ।

राष्ट्रपति भण्डारीले सोमबार (भोलि) देखि १५ गतेसम्म कतारको भ्रमण गर्नेछिन् । कतारका अमिर सेख तमिम विन हमाम अल थानीको निमन्त्रणामा राष्ट्रपति भण्डारीले कतारको तीन दिने भ्रमण गर्न लागेकी हुन् । उनको भ्रमणलाई आइतबार बसेको मन्त्रिपरिषद बैठकले स्वीकृत गरेको छ । राष्ट्रपतिको भ्रमणको अवसरमा नेपाल र कतारबीच द्विपक्षीय सहयोग सम्बन्ध सुदृढ गर्ने काम हुने सञ्चार तथा सूचना प्रविधि मन्त्री गोकुल बास्कोटाका बताए ।

सरकारले गोरखपत्र संस्थानका महाप्रबन्धक बसन्त प्रकाश उपाध्यायलाई पदबाट हटाउने निर्णय गरेको छ ।
बैठकले मलेसियासँग श्रम सम्झौता गर्ने निर्णय गर्दै त्यसका लागि श्रम तथा रोजगारमन्त्री गोकर्ण बिष्टलाई अख्तियारी पनि प्रदान गरेको छ ।
त्यस्तै कृषि तथा पशुपंक्षी विकास सम्बन्धी, स्वास्थ्य सम्बन्धी, सुरक्षा सहयोगसम्बन्धी, प्रेस तथा सूचनासम्बन्धी र कुटनीतिक राहदानी बाहकलाई प्रवेशाज्ञा छुट दिने समझदारीपत्रमा हस्ताक्षर गर्ने कार्यक्रम रहेको छ ।