एकताको पहल गर्न लोसपाले पनि बनायो ५ सदस्यीय कार्यदल

काठमाडौं । महन्थ ठाकुर नेतृत्वको लोकतान्त्रिक समाजवादी पार्टीले पनि मधेशी केन्द्रित दलहरूसँग एकताको पहल गर्न ५ सदस्यीय कार्यदल बनाएको छ । वरिष्ठ उपाध्यक्ष जितेन्द्रप्रसाद सोनारको नेतृत्वमा कार्यदल बनाएको हो ।

कार्यदलमा अर्का वरिष्ठ उपाध्यक्ष उमाकान्त झा, उपाध्यक्ष रामप्रकाश चौधरी, महासचिवद्वय सुरेन्द्र कुमार झा र मनिष कुमार मिश्र सदस्य रहेका छन् । संघीय लोकतान्त्रिक गणतन्त्रात्मक शासन व्यवस्थालाई संस्थागत गर्दै थप राजनीतिक अधिकार प्राप्तिको लागि संघर्षशील राजनीतिक शक्तिहरुबीच संवाद, सहकार्य, कार्यगत एकता आजको आवश्यकता भएको लोसपाको निष्कर्ष छ ।

कार्यदलले राजनीतिक मुद्दा र सिद्धान्त मिल्नेहरूसँग संवाद गर्न गर्नुका साथै पार्टी एकताको सम्भावना समेत खोजी गर्ने अध्यक्ष ठाकुरद्वारा जारी विज्ञप्तिमा उल्लेख छ । पछिल्लो समय विभाजित मधेश केन्द्रित दलहरू मोर्चा र सहकार्यको प्रयासमा छन् । सिके राउत नेतृत्वको जनमत पार्टीले पनि विचार मिल्ने दलहरूसँग वार्ता गर्नको लागि दुई सदस्यीय कार्यदल बनाएको छ। उनका नागरिक उन्मुक्ति पार्टीसँग सहकार्यदेखि एकतासम्मको छलफल चलिरहेको छ ।

जनता प्रगतिशील पार्टी नेपालका अध्यक्ष हृदयेश त्रिपाठीले जनता समाजवादी पार्टीका घटकहरू, लोकतान्त्रिक समाजवादी पार्टी, आम जनता पार्टी, राष्ट्रिय उन्मुक्ति पार्टीलगायतका दलहरूसँग सहकार्य थालनी गर्न अभियान चलाइरहेका छन्।