मधेस केन्द्रीत सात दलको मोर्चा घोषणा हुँदै, आलोपालो नेतृत्व गर्ने

काठमाडौं । सत्तासिन दल कांग्रेस र एमालेले संविधान संसोधन गरी थ्रेस होल्ड बढाउने, समानुपातिक निर्वाचन प्रणाली हटाउने र दुई दलीय प्रणालीमा मुलुकलाई लैजाने गरी तयारी शुरु गरेपछि मधेस केन्द्रीत दलहरु साझा मोर्चा घोषणामा अगाडी बढेका छन् ।

उनीहरुले सरकारको त्यस्तो तयारीको संयुक्त रुपमा प्रतिवाद गर्न र आफुहरुको मोर्चालाई बलियो बनाउन मोर्चा घोषणाको तयारी गरेका हुन् । मोर्चा घोषणा आज बिहिबार दिउँसो ३ बजे काठमाडौंको थापागाँउ ब्याङकेटमा एक कार्यक्रमको आयोजना गरी गर्न लागेका हुन् ।

मोर्चामा तराई मधेस केन्द्रीत सात साना राजनीतिक दल आबद्द हुने मोर्चाको एक घटकका नेता केशव झाले सफल खबरलाई बताए । मोर्चामा जनमत पार्टी, जसपा नेपाल, लोसपा नेपाल, नागरिक उन्मुक्ति पार्टी, राष्टिय मुक्ति पार्टी, जनता प्रगतिशिल पार्टी र तमलोपा आबद्द हुने बताईएको छ । यधपी नागरिक उन्मुक्ति पार्टीको यस्तो मोर्चा निर्माणका सन्दर्भमा आफ्नै केही मत रहेको र उसले मोर्चा निर्माणमा भित्री अरुची पनि देखाएकोले मोर्चा घोषणाका बेलासम्म उक्त पार्टी मोर्चा घोषणामा सँगै हुने नहुने ठेगान नलागेको पनि नेताहरुको भनाई छ ।

मोर्चाको नेतृत्व यी दलका नेताहरुले आलोपालो गर्ने गरी टुग्याउन लागेका छन् । पहिलो चरणमा मोर्चाको नेतृत्व अहिलेलाई जसपा नेपालका अध्यक्ष उपेन्द्र यादवले गर्ने समझदारी बनेको छ ।

आजको घोषणा सभामा सात वटै दलका पार्टी अध्यक्षहरुको उपस्थिती हुने बताईएको छ ।

मधेस केन्द्रीत दलहरु सत्ता र अवसरका लागि पटक पटक विभाजित हुने तर अप्ठ्यारो पर्दा भने मोर्चा बनाएर अगाडी बढ्न चाहाने शक्तिका रुपमा चिनिन्छन् । विगतमा अहिलेकै प्रधानमन्त्री केपी शर्मा ओलीले मधेस केन्द्रीत दलका सांसद अपहरण गराउने देखि मधेस केन्द्रीत राजनीतिक दल विभाजनका लागि दल विभाजनसँग सम्वन्धित अध्यादेश ल्याउने सम्मका काम अगाडी बढाएपछि रातारात केही मधेस केन्द्रीत दलहरुले पार्टी एकता नै समेत गरेका थिए ।

ठिक अहिले पनि कांग्रेस र एमाले गठबन्धनको सरकारले थ्रेस होल्ड बढाउने, समानुपातिक निर्वाचन प्रणालीमा अंकुश लगाउने र दुई दलीय राजनीतितर्फ मुलुकलाई लैजाने कोसिस गरेपछि मधेस केन्द्रीत दलहरुले एकताको आवश्यकता महसुस गरेका हुन् ।

यो मोर्चा निर्माणमा जनता प्रगतिशील पार्टीका अध्यक्ष हृदयेश त्रिपाठीले  पहल लिएका थिए ।