लोसपाले वितरण गर्दैछ पाँच लाख सदस्यता

काठमाडौँ । लोकतान्त्रिक समाजवादी पार्टी नेपालले डेढ महिनाभित्र पाँच लाख सदस्यता वितरण गर्ने भएको छ । २०८२ मा पार्टीको महाधिवेशन गर्ने लक्ष्यसहित सुरु गरिएको सदस्यता वितरण अभियानमार्फत पाँच लाख सदस्यता वितरण गरिने पार्टीका महासचिव मनिष मिश्रले बताए ।

लोसपाले जेठ ११ गतेदेखि सदस्यता वितरण अभियान सुरु गरेको छ । मधेश प्रदेशका आठवटा जिल्लामध्ये सात वटामा अभियान सम्पन्न भइसकेको छ ।अर्को चरणमा लुम्बिनी प्रदेश तथा कोशी प्रदेशमा सदस्यता वितरण गर्ने अभियान सञ्चालन हुने बताए । यो अभियान असार मसान्तसम्म चल्ने बताइएको छ ।

‘यो अवधिमा पाँच लाख सदस्यता वितरण गरिसक्नुपर्छ । डेढ महिने अभियान सम्पन्न भएपछि अधिवेशन सुरु हुन्छ’ महासचिव मिश्रले भने ।२०८२ को वैशाखमा महाधिवेशन गर्ने गरी सङ्गठनको काम अगाडि बढेको उनले बताए । तत्कालीन तमलोपाको प्रथम महाधिवेशन २०७३ मा भएको थियो । त्यसयता महाधिवेशन भएको छैन ।

तमलोपाबाट राजपा र राजपाबाट जसपा हुँदै लोसपा बनेको हो । विभिन्न पार्टीहरूसँग एकता र सहकार्य गरिरहेका कारण महाधिवेशन भएको थिएन ।