१० औँ राष्ट्रिय खेलकुद फागुनभित्रै हुन्छ : मन्त्री चौधरी

काठमाडौँ । युवा तथा खेलकुदमन्त्री तेजुलाल चौधरीले १० औँ राष्ट्रिय खेलकुद फागुनभित्रै हुने दाबी गरेका छन् । आइतबारको सार्वजनिक नीति तथा प्रत्यायोजित विधायन समितिको बैठकमा बोल्दै उनले सो दाबी गरेका हुन् ।

मन्त्री चौधरीले १० औँ राष्ट्रिय खेलकुद प्रतियोगिताका खेलहरू कर्णालीमै र फागुनभित्रै हुने प्रतिबद्धता जनाए । उनले पत्रिकाले लेखेको समाचार हेरेर भ्रममा नपर्न पनि उनले सांसदहरूसँग आग्रह गरे । उनले दसौँ राष्ट्रिय खेलकुद मंसिर २ गतेदेखि तोकिएकोमा भौतिक पूर्वाधारको कमीका कारण सञ्चालन गर्न नसकेको भएपनि अब मिति नसर्ने बताए ।

मन्त्री चौधरीले प्रदेश सरकारले करोडौं लगानी गरेर रंगशाला बनाएको भन्दै फागुनमै हुनेमा विश्वस्त हुन आग्रह गरे । भौतिक पूर्वाधार करिब सकिएको र अहिले पनि खेलाडीहरूको व्यवस्थापन ठुलो चुनौती रहेको उनले बताए ।

मन्त्री चौधरीले देश र युवाहरूको चाहना खेलकुदमा सोचेभन्दा बढी आकर्षण रहेको बताए । सरकारले खेलकुदमा बजेट बढाउन नसके युवाहरूको चाहना पूरा गर्न नसकिने उनले उल्लेख गरे ।