स्थानीय तह उपनिर्वाचन : हेटौँडा १२ मा ५० प्रतिशत बढी मतदान

हेटौँडा । स्थानीय तह उपनिर्वाचन अन्तर्गत हेटौँडा उपमहानगरपालिका वडा नम्बर १२ मा जारी मतदानमा ५० प्रतिशत बढी मतदान भएको  छ । वडा अध्यक्ष पदका लागि जारी मतदानमा १:३० बजेसम्म ५०  प्रतिशत बढी मतदान भएको  निर्वाचन कार्यलयले जनाएको छ ।

८ हजार ५३ कुल मतदाता रहेको यस वडामा ४ हजा २२३ मत खसेको छ । विष्णुज्योती आधारभूत विद्यालयमा रहेको मतदान स्थलको ४ मतदान केन्द्रमा १ हजार ८४३ मत खसेको छ भने प्रतिभा माध्यामिक विद्यालय २ हजार ३८० मत खसेको छ ।

हेटौँडा–१२ को एक वडा अध्यक्ष पदका लागि १२ जना उम्मेदवार रहेका छन् । जसमध्ये दलबाट ९ जना र स्वतन्त्र ३ जना उम्मेदवार चुनावी मैदानमा रहेका छन् ।

दलबाट कांग्रेसका अर्जुनप्रसाद तिवारी, एमालेका राजेश नगरकोटी, माओवादी केन्द्रका रवि कुमार प्रधान, रास्वपाका आशावीर बल, राप्रपाका प्रेमबहादुर भोलन, जसपाका छविलाल वाइबा, मंगोल नेशनल अर्गनाइजेशकी दीपा लामा, नेमकिपाकी फूलमाया तितुङ र एकीकृत समाजवादीका बलराम बल उम्मेदवार रहेका छन् भने स्वतन्त्रबाट अर्जुन घलान, गिताकुमारी नेवार र छत्रप्रकाश अधिकारी चुनावी मैदानमा रहेका छन् ।

२०७९ मा सम्पन्न स्थानीय तहको निर्वाचनमा निर्वाचित भएका माओवादी केन्द्रका ललितबहादुर घलान जिल्ला समन्वय समिति मकवानपुरको प्रमुख बनेसँगै हेटौँडा–१२ को अध्यक्ष पद रिक्त रहेको थियो ।