१८-२४ वर्षका विद्यार्थी साइबर ठगीमा बढी संलग्न : राष्ट्र बैंक

काठमाडौं। नेपाल राष्ट्र बैंक अन्तर्गत वित्तीय जानकारी एकाइले सार्वजनिक गरेको  'रणनीतिक विश्लेषण प्रतिवेदन-२०२४'ले १८-२४ वर्ष उमेर समूहका विद्यार्थीहरू साइबर ठगीमा सबैभन्दा बढी संलग्न रहेको तथ्याङ्क सार्वजनिक गरेको छ ।

साइबर प्रविधिमा आधारित ठगीका घटनाहरूमा पछिल्लो समय तीव्र वृद्धि भएको उल्लेख गर्दै प्रतिवेदनमा भनिएको छ, 'यस प्रकारका ठगीमा सामाजिक सञ्जालको दुरुपयोग, नक्कली अनलाइन व्यापार प्लेटफर्म, लोटरी ठगी, ओटीओई ठगी र गिफ्ट/पार्सल ठगी जस्ता प्रविधि प्रयोग हुने गरेको पाइएको छ ।

सन् २०२४ को पहिलो पाँच महिनामा भएका शङ्कास्पद साइबर ठगी कारोबारको विस्तृत विश्लेषणले १८-२४ वर्ष उमेर समूहका विद्यार्थीहरूको संलग्नता देखाएको हो । अधिकांश शङ्कास्पद कारोबार बैंकहरूमा नयाँ खुलेका खातामा पहिलो तीन महिनाभित्र भएको पाइएको प्रतिवेदनमा उल्लेख छ ।

ठगीका क्रममा सामाजिक सञ्जाल र भुक्तानी प्रणालीको दुरुपयोग हुने गरेको प्रतिवेदनले देखाएको छ । यसरी ठगीबाट प्राप्त सम्पत्ति शुद्धीकरण गर्न प्रयोग गरिने विभिन्न तरिकाको पनि प्रतिवेदनमा चर्चा गरिएको छ ।

प्रतिवेदनले साइबर ठगी न्यूनीकरणका लागि नियामक निकाय, अनुसन्धानकारी संस्था, र कानुन कार्यान्वयन निकायलाई विशेष सुझाव प्रदान गरेको छ । साथै, साइबर ठगी पहिचान गर्न बैंक तथा वित्तीय संस्थाहरूलाई 'रेड फ्ल्याग' को सूची समेत उपलब्ध गराउन सिफारिस गरिएको छ ।