शनिबार पनि दिल्लीको हावा 'गम्भीर' श्रेणीमा, काठमाडौँ प्रदूषित सहरको शीर्ष १० मा

काठमाडौँ । शनिबार भारतको राजधानी दिल्लीमा वायुको गुणस्तरको स्तर 'गम्भीर' श्रेणीमा रेकर्ड गरिएको थियो। केन्द्रीय प्रदूषण नियन्त्रण बोर्डको वेबसाइटमा बिहान ९ बजे उपलब्ध तथ्यांक अनुसार दिल्लीको सबैभन्दा प्रदूषित हावा बवाना र न्यू मोतीबाग क्षेत्रमा रेकर्ड गरिएको थियो।

दिल्लीको बवाना र नयाँ मोती बागमा एक्यूआई ४०९ मा रेकर्ड गरिएको थियो। यसबाहेक रोहिणी क्षेत्रमा पनि एक्यूआई ४०० मा रहेको छ ।जब एक्यूआई ४०० भन्दा माथि जान्छ, वायुमा प्रदूषणको स्तरलाई 'गम्भीर' श्रेणीको मानिन्छ। यी क्षेत्रहरू बाहेक, दिल्लीका धेरैजसो क्षेत्रहरूमा एक्यूआई ३ सय देखि ४ सय को बीचमा रह्यो।

दिल्लीको हावामा पीएम २.५ कण सबैभन्दा बढी प्रदूषित छ । पीएम २.५ धुलोका धेरै सानो कणहरू हुन्। दिल्लीमा यी धुलोका कणहरूलाई नियन्त्रण गर्न पानी छर्कने काम पनि निरन्तर भइरहेको छ। दिल्लीमा वायु प्रदूषणसँगै यमुना नदीमा पनि प्रदूषणको स्तर यथावत् छ । दिल्लीको कालिन्दी कुञ्ज क्षेत्रबाट बग्ने नदीमा फोमको बाक्लो तह छ।

यता आईक्यू एयरका अनुसार पाकिस्तानको लाहोर सहरमा सबैभन्दा बढी प्रदूषण रहेको छ । त्यहाँको एक्यूआई ६५९ रहेको छ । त्यस्तै, दोस्रो स्थानमा नयाँ दिल्ली र तेस्रो स्थानमा चीनको बेइजिङ रहेको छ ।

बिहान ११ बजेको मापनअनुसार काठमाडौँ पनि विश्वको दसौँ प्रदूषित सहर बनेको छ । यहाँको हावाको एक्यूआई १ सय ५४ रहेको छ । यसलाई अस्वस्थ मानिन्छ ।