कांग्रेस र एमालेले दुवै दलले मतदातालाई धोका दिए : प्रभु साह

जनकपुरधाम । आम जनता पार्टी (आजपा)का अध्यक्ष एवं पूर्वमन्त्री प्रभु साहले नेपाली कांग्रेस र नेकपा एमालेबिचको गठबन्धनको आलोचना गरेका छन् । यी दुई दलले मतदातालाई धोका दिएको समेत उनको भनाइ छ ।

दीपावली तथा छठ पर्वको अवसरमा आजपा धनुषा जिल्लाको आयोजनामा आज जनकपुरधामको पगलाबाबा धर्मशालामा आयोजित शुभकामना एवं भेटघाट कार्यक्रममा सहभागी साहले दलतन्त्र कमजोर भएपछि ठुला दुई दल कांग्रेस र एमालेले गठबन्धन गरेको बताए । 

‘पछिल्लो निर्वाचनमा एमाले नेतृत्वमा एउटा गठबन्धन थियो । अर्कोतर्फ कांग्रेसको नेतृत्वमा अर्को गठबन्धन थियो । एमालेले मतदातासँग मलाई मत दिनु एमालेको सरकार बनाउँछौँ भन्यो, र कांग्रेसले हामीलाई मत दिनुस् हामी कांग्रेसको सरकार बनाउँछौँ भन्यो । तर एमाले कांग्रेसको र कांग्रेसले एमालेको सरकार बनाउँछौ भनेका थिएनन्,’ साहले भने, ‘तर दुवै दलले मतदातालाई धोका दिए ।

अनैतिक गठबन्धन गरेपछि के यिनीहरूले मतदातासँग माफी माग्नु पर्दैन, भोट फिर्ता गर्नुपर्दैन ? एउटा दलालले जग्गा किनबेचको बैना लिन्छ तर किनबेच नभएपछि बैना फिर्ता गर्छ । यिनीहरू मतदाताको भोट फिर्ता नगर्ने कस्तो दल भएछन् ।

कांग्रेस र एमालेको निर्वाचनमा छुटाछुटै गठबन्धन रहेको र यिनीहरुको कुनै बिचार, सिद्धान्त, रुपरंग केही पनि नमिल्ने  उनले बताए । दलतन्त्र नेपालमा बर्बाद हुँदै गइरहेको बताउँदै साहले कांग्रेस र एमालेको अनैतिक गठबन्धनले दलतन्त्र नै कमजोर भएको बताए ।

‘दलतन्त्र नांगिदै गइरहेको हामी देखिरहेका छौं । दलतन्त्र कमजोर बन्दै गइरहेको छ । मतदाता, जनतालाई धोका दिने कांग्रेस र एमालेको अनैतिक गठबन्धनले दलतन्त्र कमजोर भएको छ,’ साहले भने, ‘दलतन्त्र कमजोर भयो, लोकतन्त्र कमजोर भयो । जनताका बिच कमजोर भएकाहरु मिल्नुपर्ने बाध्यता आयो । यिनीहरूले जनताको आवश्यकता, चाहना बुझ्न नसकेर कमजोर भएका छन् ।

कांग्रेस र एमालेको गठबन्धन केही नेताको सीमित स्वार्थका लागि भएको बताउँदै उनले यो गठबन्धनबाट कांग्रेस र एमालेकै नेताकार्यकर्ताहरु सन्तुष्ट नदेखिएको बताए । जनतालाई दिनुपर्ने सेवा, सुविधा दिन नसकेको यो सरकार धेरै दिन नटिक्ने उनले दाबी गरे ।