ला लिगामा रियलको जीत, बार्सिलोनासँग अंक बराबरी

एजेन्सी । स्पेनिस ला लिगा फूटबलमा रियल म्याड्रिडले भिल्लारियालविरुद्ध २–० गोल अन्तरको सहज जीत निकालेको छ ।

शनिवार राति भएको खेलमा घरेलु टोली रियललाई जीत दिलाउन फेडेरिको भाल्भर्डे र भिनिसियस जुनियरले समान एक–एक गोल गरे ।

खेलको १४औं मिनेटमा लुका मोड्रिकको पासमा भाल्भर्डेले पहिलो गोल गरेका थिए । भाल्भर्डेकै पासमा ७३औं मिनेटमा भिनिसियसले दोस्रो गोल गरेका हुन् ।

खेलमा डिफेन्डर ड्यानी कार्भाजाल भने घाइते भएका छन् । उनी अब केही साता मैदान बाहिर रहने भएका छन्

लिगका ९ मध्ये ६ खेलमा जीत निकालेको रियल २१ अंकसहित दोस्रो स्थानमा छ । एक खेल कम खेलेको बार्सिलोना समान अंकसहित गोल अन्तरका आधारमा शीर्ष स्थानमा रहेको छ ।

यस्तै भिल्लारियाल १७ अंकसहित तेस्रो स्थानमा छ । भिल्लारियालको हारले एट्लेटिको म्याड्रिडलाई फाइदा पुगेको छ ।