भाजपाले माग्यो अरविन्द केजरीवालको राजीनामा

नयाँ दिल्ली । भारतको सर्वोच्च अदालतले दिल्लीका मुख्यमन्त्री अरविन्द केजरीवाललाई सर्शत जमानत दिएको छ । जमानतमा छुटेपनि उनले मुख्यमन्त्रीको रूपमा कुनै पनि कागजपत्रमा हस्ताक्षर गर्न पाउने छैनन् ।

मुख्यमन्त्रीको काम गर्न नपाउने भएपछि कुर्सीमा किन भनेर भारतीय जनता पार्टी (भाजपा)का दिल्ली अध्यक्ष वीरेन्द्र सचदेवाले प्रश्न गरेका छन् । उनले केजरीवालको पदबाट राजीनामा दिनुपर्ने पनि बताए । सशर्त जमानत दिएर अदालतले केजरीवालको गिरफतारी वैध भएको र आरोप पनि वैध छ भन्ने स्पष्ट गरेको उनको भनाइ छ ।

केजरीवालले सशर्त जमानत पाउनु विशेष उपलब्धि नभएको पनि उनले बताए ।उनीमाथिको मुद्दा जारी नै रहेको र छिट्टै लामो सजाय हुने पनि उनले बताए । केजरीवाल जयललिता, लालु यादव, मधु कोडा जस्ता मुख्यमन्त्रीहरूको सूचीमा परेका र उनीहरूले जस्तै जमानत पाए पनि छिट्टै सजाय पाएर जेल जाने सचदेवाले भने ।

अदालतले जुन शर्त राखेर केजरीवाललाई जमानत दिएको छ त्यसमा उनलाई मुख्यमन्त्री पदमा बस्ने अधिकार नभएको उनले बताए । उनले मुख्यमन्त्रीको काम गर्न सक्दैनन् भने मुख्यमन्त्री किन बनिरहने भन्दै प्रश्न गरेका छन् । केजरीवाल इमान्दार छन् भने राजीनामा किन दिँदैनन् भन्दै उनले प्रश्न गरेका छन् ।