बढ्यो केजरीवालको न्यायिक हिरासतमा रहने समय अवधि

नयाँ दिल्ली । दिल्लीका मुख्यमन्त्री अरविन्द केजरीवालको  कठिनाइ कम हुने सङ्केत छैन । राउज एभिन्यू अदालतले दिल्लीमा रक्सी घोटालासँग सम्बन्धित सीबीआई मुद्दामा मुख्यमन्त्री केजरीवालको न्यायिक हिरासत बढाएको छ ।

उनको हिरासत अवधि बढाएर अगस्ट ८ सम्म पुर्‍याइएको छ । अब यस मामिलामा अगस्ट ८ मा सुनवाइ हुनेछ । केजरीवाल तिहाड जेलबाट भिडियो कन्फरेन्समार्फत उपस्थित भएका थिए । सीबीआईले केजरीवाललाई तिहाड जेलबाटै पक्राउ गरेको थियो ।

मनिष सिसोदिया र के कविताको न्यायिक हिरासत पनि बढ्यो

केजरीवाल बाहेक पूर्व उपमुख्यमन्त्री मनिष सिसोदिया र बीआरएस नेता के कविता पनि भिडियो कन्फरेन्स मार्फत अदालतमा उपस्थित भएका थिए । राउज एभिन्यू अदालतले मनिष सिसोदियाको न्यायिक हिरासत जुलाई ३१ सम्म बढाएको छ । के कविताको हिरासत अवधि पनि बढाएर जुलाई ३१ सम्म पुर्‍याइएको छ ।

यसअघि जुलाई १२ मा अदालतले अन्तःशुल्क नीतिसँग सम्बन्धित भ्रष्टाचार मामिलामा केजरीवालको न्यायिक हिरासत जुलाई २५ सम्म बढाएको थियो । यो मामिलामा सीबीआईले छानबिन गरिरहेको छ । केजरीवाललाई भिडियो कन्फरेन्समार्फत विशेष न्यायाधीश कावेरी बावेजासमक्ष पेस गरिएको थियो । न्यायिक हिरासतको म्याद सकिएपछि उनी केन्द्रीय अनुसन्धान ब्यूरो (सीबीआई) र प्रवर्तन निर्देशनालय (ईडी) मुद्दामा हाजिर भएका थिए ।

उता, दिल्ली उच्च अदालतले जुलाई १७ मा अन्तःशुल्क नीति मामिलामा भ्रष्टाचार गरेको मुद्दामा सीबीआईले आफूलाई गरेको गिरफ्तारीलाई चुनौती दिँदै केजरीवालले दायर गरेको याचिकामा आफ्नो फैसला सुरक्षित राखेको छ । आफ्नो उक्त गिरफ्तारीलाई केजरीवालले गैरकानुनी भनेका छन् ।

पूरै प्रमाण उपलब्ध भएपछि मात्र कानुन बमोजिम पक्राउ गरिएको सीबीआईले जनाएको छ । न्यायमूर्ति नीना बन्सल कृष्णाले केजरीवालको अन्तरिम जमानत याचिकामा पनि आदेश सुरक्षित राखेका छन् ।