जीप दुर्घटनामा घाइते युवतीको मृत्यु, चालक पक्राउ

बैतडी। जीप दुर्घटनामा घाइते भएकी एक युवतीको उपचारका क्रममा मृत्यु भएको छ । मृत्यु हुनेमा जिल्लाको सुर्नया गाउँपालिका–८ की १८ वर्षीया सविना महरा रहेकी छन्।​सविनाको उपचारका क्रममा धनगढीस्थित निःसर्ग अस्पतालमा मृत्यु भएको बैतडीका प्रहरी प्रवक्ता बलराम पाण्डेयले जानकारी दिए ।

जिल्लाको सुर्नया गाउँपालिका–८ ढुङ्गाकोटमा बाचपानीबाट दोराका लागि छुटेको सुपप्र ०१००ज १३५४ नम्बरको जीप मङ्गलबार दुर्घटनामा परेको थियो । कच्ची सडकमा जीप दुर्घटना हुँदा चालक सुर्नया–७ का लालबहादुर कुँवरसहित पाँच जना घाइते भएका थिए ।

घाइतेमध्ये सविनालाई थप उपचारका लागि डडेल्धुरा अस्पतालबाट धनगढी ‘रेफर’ गरिएको थियो ।दुर्घटनामा घाइते भएका चालक लालबहादुर कुँवर, सुर्नया–८ का २१ वर्षीय कृष्ण मडै, सोही ठाउँका ४५ वर्षीय मानबहादुर महरा र ४० वर्षीय धनबहादुर महरा डडेल्धुरा अस्पतालमा उपचारपछि घर गइसकेका छन् ।

चालक लालबहादुरलाई प्रहरीले नियन्त्रणमा लिएको छ ।घटनाबारे थप अनुसन्धान भइरहेको जिल्ला प्रहरी कार्यालयले जनाएको छ ।