योगको माध्यमबाट संसारमा नेपाल चिनाउन सकिन्छ : सभामुख घिमिरे

काठमाडौँ । सभामुख देवराज घिमिरेले योगको माध्यमबाट नेपाललाई संसारमा चिनाउन सकिने बताएका छन् ।  जीवन विज्ञान प्रतिष्ठानको आयोजनामा शुक्रबार काठमाडौँमा भएको स्वजागरण कार्यक्रमलाई सम्बोधन गर्दै सभामुख घिमिरेले नेपाल योगका लागि जन्मभूमि रहेको उल्लेख गरे ।

‘मानिसहरूलाई आध्यात्मिक रूपमा अघि बढ्न, आन्तरिक खुसी  र शान्तिपूर्ण जीवनका लागि योग जरुरी छ,’ उनले थपे, ‘हामीले योगको प्रचार गरेर संसारमा चिनिन सक्छौँ।’ ऋषिमुनिहरू र बुद्धको तपोभूमि नेपाललाई विश्वमाझ आध्यात्मिक केन्द्रको रूपमा स्थापित गर्न सकिने सभामुख घिमिरेको भनाइ छ ।

संघीय संसदका सदस्यहरूका लागि आयोजना गरिएको योगाभ्यास सम्बन्धीको स्वजागरण कार्यक्रमको उदघाटन प्रधानमन्त्री केपी शर्मा ओलीले गरेका हुन् ।