आगामी निर्वाचनअघि नै महाधिवेशन गर्ने राप्रपाको निष्कर्ष

काठमाडौँ । राष्ट्रिय प्रजातन्त्र पार्टी (राप्रपा)को दुई दिने जिल्ला अध्यक्षहरूको भेला सकिएको छ । काठमाडौँमा भएको भेलाले जनचाहना र कार्यकर्ताको भावनाअनुरूप पार्टीलाई एकताबद्ध बनाएर अगाडि बढाउनुपर्ने निष्कर्ष निकालेको छ ।

सबल र सुदृढ राप्रपा बनाउने साझा र शक्तिशाली संकल्पका साथ भेला सकिएको प्रवक्ता मोहन श्रेष्ठले बताए ।

आगामी निर्वाचन र पार्टीको महाधिवेशन एउटै समयमा पर्ने भएकाले त्यहीअनुसार तयारी गर्न पार्टी पङ्क्तिलाई भेलाले निर्देश गरेको छ । निर्वाचनलाई फोकस गर्ने गरी अधिवेशनहरूलाई चाँडै सक्ने लक्ष्य पार्टीले लिएको छ ।

२०८२ वैशाख मसान्तसम्म हरेक स्थानीय तहको अधिवेशन सक्ने लक्ष्य लिएको छ । सक्रिय सदस्यता वितरण र पार्टी प्रवेशलाई अभियानकै रूपमा लानुपर्नेमा नेताहरूको जोड छ ।

अहिलेको सरकार गठन राम्रो मनसायले नभएको भेलाले निष्कर्ष निकालेको छ ।

भेलाको निष्कर्ष छ, ‘विभिन्न काण्डहरूलाई ढाकछोप गर्न नयाँ समीकरण बनेको छ । यसले जनताको अपेक्षाकृत परिणाम दिन सक्दैन । ठूला भनिएका पार्टीहरू दलदलमा फसेको र नयाँ भनिएका पार्टीहरूले जनतामा आशा पैदा गर्न नसकेको अवस्थामा राप्रपाको लागि उर्वर अवसरको रूपमा लिनुपर्छ भन्ने निष्कर्ष रह्यो ।’