अस्ट्रेलियाले स्कटल्यान्डलाई हराउँदा इंग्ल्यान्ड सुपर ८ मा

एजेन्सी । टी–२० विश्वकपमा अस्ट्रेलियाले आफ्नो अपराजित यात्रा जारी राख्दै स्कटल्यान्डलाई ५ विकेटले पराजित गरेको छ । आइतबार भएको समूह बी अन्तर्गतको खेलमा स्कटल्यान्डले प्रस्तुत गरेको १ सय ८१ रनको लक्ष्य अस्ट्रेलियाले १९.४ ओभरमा ५ विकेटको क्षतिमा पछ्यायो ।

अस्ट्रेलियाको जित साबिक विजेता इंग्ल्यान्डका लागि वरदान साबित भएको छ । नेट रन रेटका आधारमा स्कटल्यान्डलाई पछि पार्दै टोली सुपर ८ मा प्रवेश गरेको छ । दुई टोलीको अङ्क समान भए पनि इंग्ल्यान्डको रन रेट स्कटल्यान्डभन्दा राम्रो रहेको छ ।

यसअघि इंग्ल्यान्डले नामिबयालाई हराउँदै स्कटल्यान्डसँग अङ्क बराबरी गरेको थियो । ४ खेलपछि ८ अङ्क बटुल्दै अस्ट्रेलिया समूह विजेता बन्यो । ५ अङ्क र राम्रो नेट रेटसहित इंग्ल्यान्ड दोस्रो बन्यो ।

अस्ट्रेलियाका लागि ओपनर ट्राभिस हेडले सर्वाधिक ६८ रनको योगदान दिए । उनले ४९ बलमा ५ चौका र ४ छक्का प्रहार गरे । 

मध्य क्रममा लय गुमाएपछि अस्ट्रेलियाका मार्कस स्टोइनिसले तीव्र गतिमा अधशतकीय इनिङ्स खेले । उनले मात्र २९ बलमा ५९ रन जोडे । यस क्रममा उनले ९ चौका र २ छक्का हिर्काए ।

टीम डेभिडले नटआउट रहेर १४ बलमा २४ रन जोड्दै टोली जितसम्म डोर्‍याए । स्कटल्यान्डका लागि मार्क वाट र सफयान सरिफले २-२ विकेट लिए भने ब्राड व्हिलले १ विकेट लिए ।