वीरगन्जमा भेटियो युवकको शव

वीरगन्ज । पर्साको वीरगन्जमा एक युवकको शव फेला परेको छ। 

वीरगन्ज महानगरपालिका- १६ शंकराचार्य गेटस्थित खुला चौरमा एकजना युवकको शव फेला परेको जिल्ला प्रहरी कार्यालय पर्साले जनाएको छ।

युवकको हत्या भएको आशंका प्रहरीले गरेको छ। उनको अनुहारमा रगत देखिएको छ।  आइतबार साँझतिर खुला चौरमा एक जना व्यक्ति मृत फेला परेको सूचना प्रहरीलाई पुगेको थियो। प्रहरीले शव पोस्ट मार्टमका लागि अस्पतालमा लगेको छ।

मृतक युवक झण्डै ३० वर्षका छन्। कालो रंगको सर्ट, निलो टिसर्ट, कालो जिन्स पाइन्ट र खैरो रंगको जुत्ता लगाएका उनको सनाखत हुन नसकेको प्रहरीले जनाएको छ।