मन्त्रिमण्डल विस्तार गर्दै मुख्यमन्त्री कार्की, साढे ४ बजे शपथ ग्रहण

विराटनगर। कोशी प्रदेशका मुख्यमन्त्री हिक्मतकुमार कार्कीले शुक्रबार दोस्रोपटक मन्त्रिमण्डल विस्तार गर्ने तयारी गरेका छन् ।मन्त्रिमण्डल विस्तारलगत्तै दिउँसो साढे ४ बजे शपथ ग्रहणका लागि खबर गरी सकिएको विनाविभागीय मन्त्री रामबहादुर राना मगरले बताए ।

उनका अनुसार एमालेले १ राज्यमन्त्रीसहित तीन जनाको नाम थप गर्ने भएको छ ।शुक्रबार  एमालेबाट लिलाबल्लभ अधिकारी, एकराज कार्की र पाँचकर्ण राई मन्त्री तथा सिर्जना राईलाई राज्यमन्त्री बनाउने सहमति भएको मन्त्री मगरले बताए । यस अघि पनि उनीहरू मन्त्री भएका थिए ।

यस्तै माओवादी केन्द्रले दुई मन्त्री र एक राज्य मन्त्रीलाई शपथ खुवाउने भएको छ ।  माओवादीबाट राजेन्द्रकुमार कार्की र नारायण बुर्जा मगरलाई मन्त्री तथा वन्दना झाँगडलाई राज्यमन्त्रीमा नियुक्त तयार गरिएको छ ।

संविधानको धारा १६८ (५) अनुसार गत वैशाख २७ गते मुख्यमन्त्रीमा नियुक्त कार्कीले मुख्यमन्त्री भएकै दिन एमालेका रामबहादुर राना मगर र माओवादीका गणेश उप्रेतीलाई मन्त्री बनाएका थिए ।मन्त्रालयको भने टुङ्गो लागि नसकेको नेताहरूले बताएका छन् ।

अहिले दुवै दलका नेताहरू मन्त्रालय टुङ्गो लगाउन छलफल गरिरहेको जनाइएको छ ।दिउँसो ४:१५ बजे शपथका लागि तयारी हुन खबर आएको एमालेका लिलाबल्लभ अधिकारीले बताए ।