प्रत्यक्ष निर्वाचन क्षेत्रका लागि ५० करोडको योजना दिन सांसद् घिमिरेको माग

काठमाडौँ । नेपाली कांग्रेसका सांसद् श्यामकुमार घिमिरेले प्रत्येक निर्वाचन क्षेत्रमा सांसद्को सिफारिसमा कम्तिमा ५० करोड रुपैयाँका योजना दिन माग गरेका छन् । बिहीबार प्रतिनिधिसभा बैठकको शून्य समयमा बोल्दै घिमिरेले देशभरका १६५ निर्वाचन क्षेत्रका सांसद्को सिफारिसमा ५० करोड रकम बराबरको योजना दिन माग गरेका हुन् ।

सांसद्हरूलाई ५-१० करोड रुपैयाँमात्रै नचाहिएको उनको भनाइ छ । सांसद घिमिरेले आगामी आर्थिक वर्षको बजेट निर्माणमा सांसदहरूको भूमिका नभए बजेट पारित गर्न नदिने चेतावनी दिए ।

‘आगामी आर्थिक वर्षको बजेट निर्माणमा सांसदको भूमिका र सहभागिता भएन भने हामी यो बजेट पारित गर्नको लागि सहयोगी मात्रै बन्दैनौं । बजेटमा विपक्षी सांसदको ठूलो भूमिका हुन्छ भन्ने कुराको नजिर स्मरण गराउँछु,’ उनले भने ।