मन्त्री निवास छाड्दै किरातीले भने: ‘पस्दा धेरै डर लागेको थियो, निस्कँदा खुसी छु’

काठमाडौँ । प्रधानमन्त्री पुष्पकमल दाहाल ‘प्रचण्ड’ ले मन्त्रिपरिषद् पुनर्गठन गरेसँगै निवर्तमान संस्कृति पर्यटन तथा नागरिक उड्डयन मन्त्री सुदन किरातीले सरकारी निवास छाडेका छन् । उनले मन्त्री निवासमा पस्दा आफूलाई डर लागेको तर निस्कँदा भने आफू खुसी रहेको जिकिर गरेका हुन् ।

उनले  ४१३ दिन मन्त्री पदमा बसेर देश र जनताको सेवा गरेको बताएका छन् । आफूलाई सेवाको अवसर प्रदान गरेकोमा प्रधानमन्त्री प्रचण्ड, पार्टी, मतदातालगायत सबैमा धन्यवाद ज्ञापन गरेका छन् । उनले आफूले सुरुवात गरेको कामलाई नयाँ मन्त्रीले  निरन्तरता दिनेमा आशा व्यक्त गरेका छन् ।

उनले सामाजिक सञ्जाल फेसबुकमा लेखेका छन्, ‘आज सरकारले दिएको निवास छोडेर जाँदै छु । पस्दा मलाई धेरै डर लागेको थियो तर निस्कँदा खुसी छु । मेरो आमाले भन्नुहुन्थ्यो ‘जिम्मेवारी पाउनु गाह्रो कुरा हो त्यो भन्दा गाह्रो त पूरा गर्नु हो’ ।

४१३ दिन मन्त्री पदमा बसेर देश र जनताको सेवा गरे। यो अवसर प्रदान गर्नु हुने प्रधानमन्त्री "प्रचण्ड", मेरो पार्टी, मलाई मत दिनुहुने मतदाताहरू र संसारका कुना-कुना बाट मलाई सहयोग र सहानुभूति दिनुहुने सम्पूर्ण महानुभावहरूमा धन्यवाद ज्ञापन गर्दछु । म र मेरो टिमले  सकेको कोसिस गरेका छौँ । हामीले रोपेको बिरुवामा धेरै कोपिला लागेको छ, आउने मालीले फक्राउनु हुनेछ भन्ने विश्वास लिएको छु ।

मैले यहाँ बस्दा मेरो बुबाको एक प्राण लिने मृत्यु मात्र देखिन मेरो राजनीतिक जीवनको हजार मृत्युहरू पटक पटक देखे र राजनीतिक मृत्युलाई मैले छल्न सके तर  प्राण लिने मृत्युलाई बुबाले छल्नु सक्नु भएन । सत्य यो रहेछ कि भौतिक मृत्यु माथि अठोट र इमानले जित्न नसकिँदो रहेछ तर राजनीतिक मृत्युलाई अठोट र इमानले जित्न सकिँदो रहेछ।’