संयुक्त राष्ट्रसंघका महासचिवको नेपाल भ्रमण 'प्रयोजनविहीन' : कमल थापा

काठमाडौं। राप्रपा नेपालका अध्यक्ष कमल थापाले संयुक्त राष्ट्रसंघका महासचिव एन्टोनियो गुटरेसको नेपाल भ्रमण 'प्रयोजनविहीन' भएको बताएका छन् । चार दिने नेपाल भ्रमणको क्रममा गएराति १ बजे नेपाल आएका महासचिव गुटरेसको भ्रमणलाई अध्यक्ष थापाले ‘प्रयोजनविहीन’ भएको टिप्पणी गरेका हुन् ।

उनले यस भ्रमणबाट आफू आश्चर्यजनकसमेत रहेको जनाएका छन् ।‘अतिथिलाई स्वागत छ तर’ भन्दै महासचिव गुटरेसले हमास–इजरायल युद्धमा ध्यान नदिएको उनको आरोप छ । ‘ईजरायल–गाजा युद्धमा प्रत्येक दिन सयौं व्यक्तिहरूले ज्यान गुमाइरहेका छन्, नाकाबन्दीले लाखौंको जीवन कष्टकर भैरहेको छ,’ थापाले भनेका छन्।,

‘यस्तो बेला संक्रमणकालीन न्यायको उपेक्षा गर्ने सरकारको निम्तोमा संयुक्त राष्ट्रसंघका महासचिव गुटरेसको ‘प्रयोजनविहीन’ नेपाल भ्रमण आश्चर्यजनक छ ।

आज प्रधानमन्त्री प्रचण्डले उनको सम्मानमा सोल्टी होटलमा दिने रात्रि भोजमा आमन्त्रित थापा सहभागी नहुनेसमेत स्रोतले जनाएको छ । सङ्क्रमणकालीन न्यायका धेरै काम टुङ्गो नलागिसकेको अवस्थामा यस्तो कार्यमा थापाको विमति रहेको बुझिएको छ ।

चार दिने नेपाल भ्रमणको क्रममा महासचिव गुटरेसले उच्चस्तरीय भेटवार्ता गर्नेछन् । उनी नाम्चे, पोखरा, अन्नपुर्ण बेस क्याम्प, लुम्बिनी पुग्ने कार्यक्रमसमेत छ ।महासचिव गुटरेसले मंगलबार भने संघीय संसदको संयुक्त बैठकलाई सम्बोधन गर्ने कार्यक्रम रहेको छ ।