‘ई’को अभियानमा कांग्रेस केन्द्रीय सदस्य महरको ऐक्यबद्धता

काठमाडौं। नेपाली कांग्रेसका केन्द्रीय सदस्य नैनसिंह महरले फुटपाथ व्यवसायीको पक्षमा गरिरहेको आन्दोलनप्रति ऐक्यबद्धता जनाएका छन् ।सात दिनदेखि काठमाडौं महानगरपालिकाको कार्यालय रहेको राष्ट्रिय सभागृहअगाडि लगातार उभिइरहेका ‘ई’को अभियानमा मंगलवार त्यहाँ पुगेरै महरले ऐक्यबद्धता जनाएका हुन् ।

अभियान्ता ‘ई’सँग भेट्दै नेता महरले फुटपाथमा रोजिरोटीका लागि व्यापार गरिरहेका मानिसहरुको व्यवस्थापन कसरी गर्ने भन्ने अहिलेको मुख्य सवाल रहेकाले यसमा स्थानीय सरकारदेखि केन्द्रसम्मको गम्भीर ध्यानाकर्षण हुनुपर्ने बताए । 

उनले आफू आबद्ध पार्टी कांग्रेसले पनि गम्भीरता पूर्वक फुटपाथ व्यवसायीको व्यवस्थापनका लागि पहलकदमी लिने बताए ।‘ई’लाई भेटेर उनको माग सम्बोधन गराउन दबाब सिर्जना गर्न अहिले विभिन्न दलका नेता–कार्यकर्तादेखि अभियानकर्मीसम्म सभागृह पुग्ने क्रम जारी छ ।