घनश्यामलाई महासचिव बनाएर वामदेवलाई पनि भित्र्याउने नेकपा एसको तयारी

काठमाडौँ । नेकपा एकीकृत समाजवादीले घनश्याम भुसाललाई पाटीएको महासचिव बनाउने तयारी गरिरहेको छ । स्रोतका अनुसार हाल महासचिवको जिम्मेवारीमा रहेका वेदुराम भुसाललाई उपाध्यक्ष बनाउने र महासचिवको जिम्मेवारी घरश्याम भुसाललाई दिने पार्टीभित्र सहमति बनिसकेको छ ।

तत्कालीन नेकपा विभाजनलगत्तै एमालेबाट फुटेर एकीकृत समाजवादी गठन भएको थियो । घनश्याम भुसाल सुरुमा माधव नेपाल पक्षमै रहे पनि विभाजनका बेला भने एमालेमै बसेका थिए । तर गत मंसिर ४ को आमनिर्वाचनका बेला एमाले अध्यक्ष केपी ओलीले भुसाललाई टिकट नदिएपछि एमालेबाट अलग्गिएर स्वतन्त्र रुपमा चुनवा लडेका थिए । हालै मात्र उनलाई एकीकृत समाजवादीले पार्टीमा भित्र्याएको हो । अब महासचिवको जिम्मेवारी दिने औपचारिक निर्णय भने यही माघ २१ र २२ गते बोलाइएको केन्द्रीय कमिटी बैठकबाट हुने जनाइएको छ ।

यसका साथै एकीकृत समाजवादीले एमालेबाटै अलग्गिएका नेता वामदेव गौतमलाई पनि पार्टीमा भित्र्याउने कोसिस गरिरहेको बुझिएको छ । उचित जिम्मेवारी दिएर ससम्मान गौतमलाई पार्टीमा भित्र्याउन समाजवादीका नेताहरु सकारात्मक रहेको स्रोतको भनाइ छ । गौतम आफैले पनि एकीकृत समावादीका अध्यक्ष माधव नेपाल र अन्य वरिष्ठ नेताहरुसँग अनौपचारिक रुपमा संवाद गरिरहेको बुझिएको छ ।