कुनै पार्टीसंग एकता गर्ने निर्णय भएको छैन : गंगानारायण तुलाधार

काठमाडौं । नेकपा एकीकृत समाजवादीका पार्टी कार्यालय सचिव गंगानारायण तुलाधारले पार्टी एकता गर्ने  विषयमा कुनै निर्णय नभएको स्पष्ट पारेका छन् । पार्टी स्थायी समिति बैठकपछि सञ्चारकर्मीसंग बोल्दै तुलाधारले अनौपचारिक रुपमा सबै पार्टीसंग भई रहेको भेटघाट र छलफल अन्यथा नलिन आग्रह गरे । 

‘एकताका वारेमा कुनैपनि निर्णय भएको छैन । एकता गर्नेगरी घनिभुत रुपमा पार्टीका औपचारिक बैठक र छलफल भएका छैन । अहिले नै तत्काल एकतामा गइहाल्नुपर्छ भन्ने अवस्था होइन’ तुलाधारले भने, ‘अनौपचारिक रुपमा यस्ता धेरै कुराहरु भएका छन् । हाम्रा  पार्टीका नेताहरुले जसपा माओवादी नेतासंग कुरा गर्नु भएको छ ।’  चुनाव भन्दा अगाडि माओवादीसंग एकता गर्नेगरी छलफल भएपनि कुनै निष्कर्षमा नपुगीएको तुलाधारले बताए ।

‘चुनाव अघि एकीकृत समाजवादीमा र माओवादीवीच एकता गर्न  वार्ता र छलफल गर्न प्रयास गर्रौ भन्नेगरी माओवादीबाट प्रस्ताव आयो ।  हामीले सचिवालयमा छलफल गरियौं । एकता गर्ने नै हो छलफल गरौं भन्ने भयो ’ तुलाधारले भने, ‘त्यसमा माओवादीबाट कुनै सक्रियता देखिएन । अहिले त्यसमा केही भएकै छैन ।’