लुम्बिनी प्रदेशमा बजेटमाथिको छलफल सुरु

रुपन्देही । लुम्बिनी प्रदेश सरकारले पेश गरेको बजेटमाथि लुम्बिनी प्रदेशसभामा छलफल शुरु भएको छ । बैठकमा आर्थिक वर्ष २०७८/७९ को बजेटका बारेमा आजबाट मन्त्रालयगत छलफल सुरु भएको हो ।

आज र भोलि बजेटमाथि छलफल हुने र असार ३० गते उठेका प्रश्नको सम्बन्धित मन्त्रीले जवाफ दिने कार्यक्रम तय भएको छ । असार १ गते आर्थिक मामिला तथा योजनामन्त्री बैजनाथ चौधरीले बजेट प्रस्तुत गरेपछि २७ दिनपछि हिजो मात्र छलफलका लागि प्रदेशसभामा प्रवेश पाएको थियो ।

प्रदेश सरकारको वैधानिकतामाथि प्रश्न उठाउँदै बजेटमाथिको छलफल बहिष्कार गर्दै आएका विपक्षी दलले हिजोदेखि शुरु भएको सदनमा सहभागी भएका छन् । बजेटमाथि विपक्षी दलका संसदहरुले प्रचारमुखी बजेट भन्दै कार्यान्वयन हुन नसक्ने जनाएका छन् भने सत्तारुढ दलका सांसदहरुले बजेट जनमुखी भएको बताएका छन् ।