बीपी प्रतिष्ठान बचाउन माग गर्दै माइतीघरमा प्रदर्शन

काठमाडौँ ।  धरानस्थित बीपी कोइराला स्वास्थ्य विज्ञान प्रतिष्ठान बचाउन माग गर्दै कर्मचारीहरुले थालेको आन्दोलनको समर्थनमा नागरिक समाजले काठमाडौँमा प्रदर्शन गरेको छ।

आइतबार दिउँसो माइतीघर मण्डलामा विभिन्न नारा लेखिएका प्लेकार्ड बोकेर प्रतिष्ठान बचाउन माग गर्दै नागरिक समाजले प्रदर्शन गरेको हो।

पछिल्लो समय उपकुलपति लगायत प्रतिष्ठानका पदाधिकारीहरुले नै अनियमितता गरेको आरोप लगाउँदै उनीहरुको नेतृत्वमा काम गर्न नसक्ने भन्दै प्रतिष्ठानका कर्मचारीहरुले आन्दोलन गरिरहेका छन्।

प्रतिष्ठानमा भएको अनियमितता विषयमा छानबिन प्रक्रिया अघि नबढे सबै चिकित्सक, स्वास्थ्यकर्मी तथा कर्मचारीले सामुहिक राजिनामा दिने तयारी गरेका छन्।