अभिनेत्री श्वेता भट्टराईका श्रीमान् मिलनसापकोटाको कोरोना संक्रमणबाट निधन

काठमाडौं । अभिनेत्री श्वेता भट्टराईका श्रीमान् मिलन सापकोटाको निधन भएको छ । सापकोटाको कोरोनाको कारण मंगलबार निधन भएको हो । सापकोटाको निधन भएको फिल्म निर्देशक जनकदीप पराजुलीले सामाजिक संजाल मार्फत सार्वजनिक गरेका छन् ।

‘मेरो चलचित्र ‘प्रोड्युसर’की अभिनेत्री स्वेता भट्टराईको श्रीमान् मिलन सापकोटाको कोभिडको कारणले निधन भएको खबर सुनेर स्तब्ध भएको छु । अझै पनि यो खबर सत्य होइन जस्तो लागि रहेछ । तर, सत्यको अगाडि कसैको केही लाग्दैन’ पराजुलीले अगाडि लेखेका छन् ‘स्वेतालाई भगवानले धैर्यधारण गर्न सक्ने शक्ति प्रदान गरून् ।’ 

निर्देशक पराजुलीले मृत्यु भएका सापकोटा प्रति श्रद्धाञ्जली ब्यक्त गर्दै परिवारजनमा हार्दिक समबेदना समेत प्रकट गरेका छन् । सापकोटासँग अभिनेत्री श्वेताले ७ वर्ष अगाडि प्रेम विवाह गरेकी थिइन् । उनीहरुको एक सन्तान पनि छ । अभिनेत्री स्वेताले ‘रिदम, ब्ल्याकमेल, प्रोड्यूसर’लगायत करिव आधादर्जन बढी चलचित्र अभिनय गरेकी छन् । बिवाह पछि भने उनी अभिनयबाट टाढा भएकी थिइन् ।