वन निगममा ‘सिइओ’ नियुक्ति प्रक्रिया अन्तिम चरणमा

काठमाडौं । वन तथा वातावरण मन्त्रालयले ‘नेपाल वन निगम लमिटेड’मा लामो समयदेखि रिक्त प्रमुख कार्यकारी अधिकृत सिइओ नियुक्ति प्रक्रिया अघि बढाएको छ । मन्त्रालयले सो पदमा दरखास्त दिने उम्मेदवारह मध्येबाट मोरङका पंकजकुमार दास, काठमाडौँका अच्युतराज पहाडी र बझाङका रामेश्वर भट्टराईको नामावली छनोट सूची परेको सूचना यही वैशाख १८ गते सार्वजनिक गरेको हो ।
 
 ‘सर्टलिष्ट’ परेकाको वैशाख २६ गते व्यावसायिक कार्ययोजनाको प्रस्तुतीकरण र २७ गते अन्तर्वार्ता गरिने परिक्षा तालिका मन्त्रालयले यस अघि नै प्रकाशन गरिसकेको मन्त्रालयका प्रवक्ता प्रकाश लम्सालले जानकारी दिए । यस अघि आवेदन परेकाहरूको वैशाख १५ र १६ गते व्यवसायिक कार्ययोजनाको अध्ययन मूल्याङ्कन कार्यक्रम गरी सूची प्रकाशन गरिएको थियो ।
     
मन्त्रालयले गत चैत ३ गते निगमको प्रमुख कार्यकारी अधिकृत पदमा खुला प्रतिष्पर्धात्मक प्रतियोगताद्वारा पदपूर्ति गर्न १५ दिनको समयावधि तोकी सूचना प्रकाशित गरेको थियो । साथै यसअघि २०७६ साल भदौ १ गते मन्त्रालयद्वारा नै प्रकाशित वन निगमको प्रमुख कार्यकारी अधिकृतको नियुक्तिको विज्ञापन २०७७ साल चैत १ मन्त्रिस्तरीय निर्णयबाट रद्द गरिएको थियो ।
 
सूचनाअनुसार उक्त पदमा मान्यताप्राप्त विश्वविद्यालयबाट सम्बन्धित विषयमा स्नातकोत्तर उपाधि गरी सम्बन्धित क्षेत्रमा सात वर्ष काम गरेको र ३० वर्ष उमेर पूरा भएको योग्यता तोकिएको थियो । सिइओ छनोटका लागि गठिन समितिले अन्तिम तीन जनाको नामावली छनोट गरी मन्त्रालयमा पठाउने र मन्त्रालयको प्रस्तावमा तीन जनामध्येबाट मन्त्रिपरिषद् बैठकले एक जनालाई नियुक्ति गर्नसक्ने कार्यविधिमा व्यवस्था छ ।

वन व्यवस्थापनबाट उत्पादन हुने काठ दाउराको व्यवस्थितरूपमा कटान सङ्कलन, चिरान गरी सर्वसाधारण जनतालाई आपूर्ति गर्ने उद्देश्ले २०१७ सालमा स्थापित द टिम्बर कर्पोरेसन अफ नेपाल लिमिटेडको नै हालको वन निगम हो ।