डिसेम्बर दोश्रो साता परराष्ट्र मन्त्री ज्ञवालीलाई भारत भ्रमणको निम्तो

काठमाडौं । परराष्ट्र सचिव स्तरीय वार्ताका लागि नेपालको दुई दिने भ्रमणमा आएका भारतीय विदेश सचिव हर्षवद्र्दन श्रृंखलाले परराष्ट्र मन्त्री प्रदीप ज्ञवालीलाई भारत भ्रमणको निम्तो गरेका छन् । आगामी डिसेम्बर दोश्रो साता भारतमा दुई देशका परराष्ट्र मन्त्री स्तरमा सम्वाद गर्ने गरी परराष्ट्र मन्त्री प्रदीप ज्ञवालीलाई श्रृंखलाले भारत भ्रमणको निम्तो गरेका हुन् ।

दुई देश बीच गत वर्ष देखि टुटिरहेको सम्वाद परराष्ट्र सचिव स्तरीय वार्तापछि खुलेको छ । परराष्ट्र मन्त्री स्तरको वार्ताको मिति ठ्याक्कै टुंगो नलागेपनि डिसेम्बर दोश्रो साता गर्ने विषयमा दुवै देश सहमत भएका छन् । त्यो वार्ता भारतमा गर्ने समझदारी भने बनेको छ ।

‘परराष्ट्र मन्त्रीस्तरको संयुक्त आयोगको बैठक डिसेम्बर दोश्रो साता भारतमा गर्ने विषयमा परराष्ट्र सचिव स्तरीय वार्तामा समझदारी बनेको छ । मिति टुंगो अबको केही दिनमा लाग्नेछ । त्यो वार्ताका लागि भारतीय विदेश सचिवले परराष्ट्र मन्त्री ज्ञवालीलाई निम्तो समेत गरिसकेका छन्,’ परराष्ट्र मन्त्रालय स्रोतले सफलखबरसँग भन्यो ।

नेपाल र भारतका बीचमा देखा परेको कालापानी, लिपुलेक र लिम्पियाधुरा र अर्काेतिर सुस्ता तिरको सिमाना सम्बन्धी विवादलाई अव द्दिदेशिय छलफलको प्रक्रियामा लैजाने विषयमा पनि नेपाल भ्रमणमा आएका भारतीय विदेश सचिव हर्षवद्र्दन श्रृंखलाको भेटका बारेमा छलफल भएको छ ।

विदेश सचिव श्रृंखलाले प्रधानमन्त्री केपी ओली, राष्ट्रपति विद्यादेवी भण्डारी, परराष्ट्रमन्त्री प्रदीप ज्ञवाली, परराष्ट्र सचिव लगायतसँग भेटवार्ता गरिसकेका छन् ।

उनले हिजै विपक्षी दलका नेता काँग्रेस सभापति शेरबहादुर देउवा र केही मधेसवादी दलका नेताहरुसँग पनि सम्वाद गरेका थिए । राती द्दारिकाज होटलमा आयोजित रात्री भोजमा उनी सहभागी भएका थिए । उनी गोरखा र मनाङ भ्रमण गरेर आजै स्वदेश फर्किने कार्यक्रम छ ।